Humanitar atəşkəs rejiminə əməl etməyən Ermənistan silahlı qüvvələrinin bölmələri qüvvə və vasitələri cəmləşdirərək cəbhənin müxtəlif istiqamətlərində hücum etməyə cəhd göstərib.
 
Ovqat.com-a bu barədə Müdafiə Nazirliyindən məlumat verilib. 
 
Məlumata görə, düşmən günorta saatlarında Tuğ kəndi istiqamətindən Hadrut istiqamətində, Aragül və Banazur istiqamətlərindən isə Cəbrayıl istiqamətində hücum etməyə cəhd göstərib.
 
Bölmələrimizin gördüyü qabaqlayıcı tədbirlər nəticəsində xeyli canlı qüvvə və döyüş texnikasını itirən düşmən geri çəkilməyə məcbur edilib. Müdafiəni düzgün təşkil edən bölmələrimiz düşmənin irəliləməsinin qarşısını alıb, onu tələyə salaraq darmadağın edib. Döyüş toqquşması nəticədə düşmənin 38 nəfər canlı qüvvəsi, 2 ədəd BM-21 “Qrad” yaylım atəşli reaktiv sistemi, 7 ədəd topu və sursatla dolu 2 yük maşını məhv edilib.
 
Qoşunlarımız hazırda bütün cəbhə boyu əməliyyat üstünlüyünə malikdir.
 
Ovqat.com-un erməni mənbələrindən əldə etdiyi məlumata görə, ordumuzun Hadrut cəbhəsində məhv etdiyi düşmən əsgərlərindən biri də Ermənistanın “milli qəhrəmanı” sayılan Aleksandr Arutyunyandır. Aleksandr Arutyunyanın hələ birinci Qarabağ müharibəsi illərində törətdiyi vəhşiliklərə görə Ermənstan tərəfindən I dərəcəli "Hərbi xaç" ordeni ilə təltif edildiyi bildirilir.