«Rosselxoznadzor» sabahdan etibarən Azərbaycanın bir pomidor istehsalçısına Rusiyaya məhsul satmasına icazə verəcək.
 
Ovqat.com xəbər verir ki, qurumun media açıqlamasında belə deyilir.
 
Məlumata görə, həmin müəssisə “Agroterm” MMC-dir.
 
"Təqdim olunan məlumatların təhlilinin nəticələrinə əsasən, «Rosselxoznadzor», Azərbaycan Qida Təhlükəsizliyi Agentliyinin zəmanəti ilə Xızı bölgəsində yerləşən “Agroterm” MMC müəssisəsindən 16 dekabr 2020-ci il tarixindən etibarən pomidor idxalına icazə verilməsini mümkün sayır”,- rəsmi açıqlamada deyilir.
 
«Rosselxoznadzor» əlavə etdi ki, Azərbaycanda daha iki istixananın məhsul idxalına icazə verilməsi məsələsi də gözdən keçirilir: "Bu istiqamətdə respublikanın səlahiyyətli şöbəsi ilə danışıqlar aparılır".
 
Qeyd edək ki, dekabrın 8-də «Rosselxoznadzor» Azərbaycandan Rusiyaya pomidor və alma idxalına qadağa qoymuşdu. Azərbaycanın rəsmi dairələri isə «Rosselxoznadzor» qərarının texniki səhvlə əlaqəli ola biləcəyini və məsələnin həll olunacağına ümid etdiklərini bildirmişdilər. 
 
Qadağa Rusiya pərakəndə satıcılarında böyük narahatlığa səbəb oldu, çünki Azərbaycan Rusiyanın pomidor idxalının 38% -ni təchiz edir.