Bir il əvvəl Naxçıvan MR Mədəniyyət Nazirliyində ciddi yoxlamalar olub. Yoxlamaları Ali Məclis və MR Maliyyə Nazirliyi aparırıb.

Ovqat.com-a bu barədə məlumatı kod adı “Mədəni Qara Pişik” olan mənbəmiz verib. 

Mədəni “Qara Pişiy”in iddiasına görə, ötən ilki yerli yoxlamalarda da xeyli saxtakarlıqlar aşkarlanıb. “Məsələn, musiqi məktəb müəllimlərinə əlavə dərs saatlarının yazılması kimi. Hansı ki, o dərs saatlarından ixtisas müəllimlərinin belə, xəbəri olmayıb. Bu yalançı dərslərə ritmika, üzündən oxu, konsertmeysterlik, müşayiət və s. kimi fənnlər daxildir. Hərəsinə 24 saat yazılaraq, külli miqdarda vəsait mənimsənilmişdi”, - mənbəmiz bildirir.

Araşdırmalar zamanı Mədəniyyət Nazirliyində xeyli bankomat kartının da aşkarlandığını bildirən həmsöhbətimiz bundan başqa, müəllimlərin dərsinə əlavə saatların yazılmasından tutmuş dərsə gəlməyən şagirlərə qədər bir çox saxtakarlıqların müəyyənləşdirildiyini bildirir: “Amma bu yoxlamaların nəticəsində yenə olan müəllimlərə oldu. Yoxlamalardan sonra müəyyənləşdirilən artıq dərslər silindi, büdcədən mədəniyyətə ayrılan vəsait xeyli azaldıldı. Yoxlamalarda aşkarlanan saxtakarlıqların fakturası bir neçə nəfərə kəsildi. Ötən ilki yoxlamar nəticəsində Musiqi kollecinin müdiri Günay Əliyeva, Mədəniyyət şöbəsinin müdiri Təranə Qasmova, Nazirliyin Aparat rəhbəri Leyla Əlimərdanova, Flarmoniyanin müdiri Səməd Əsgərov vəzifəsindən uzaqlaşdırıldı. Hər kəs gözləyirdi ki, bu cəza tədbirlərindən sonra Natəvan Qədimova lazımi dərslər çıxaracaq. Fəqət Nazirliyin rəhbərliyi yenə əvvəlki qazanclarını götürmək üçün başqa bir çarələr tapdı. Bu səfər müəllimlərin dərs saatı azaldıldı, yenə hər bir müəllimin üzərinə əlavə dərs saatları yazıldı və mənimsənildi”.

Bildirilir ki, Naxçıvan rəhbərliyi sözügedən yoxlamaları təkcə “kadr islahatları” ilə sonuclandırmayıb. Bəzi “struktur islahatları” da aparılıb. Təbii ki, Naxçıvanvari şəkildə. Məsələn, Musiqi kolleci Mədəniyyət Nazirliyindən alınıb Naxçıvan Dövlət Universitetinə verildi. Məqsəd guya, Musiqi kollecində təhsilin keyfiyyətini yüksəldib Konservatoriya səviyyəsinə qaldırmaq idi. Amma Vasif Talıbov həzrətləri deyəsən fərqində deyil ki, nəyisə hardansa kəsib başqa yerə yapışdırmaqla keyfiyyət dərəcəsini yüksəltmək mümkün deyil. Bu, sadəcə Həsənin adına Həsqo deməyə bənzəyir.

Yeri gəlmişkən, Musiqi kollecində aparılan yoxlamalar zamanı o da müəyyənləşdirilib ki, bu təhsil ocağında dərs deyən müəllimlərin heç birinin ali savadı yoxdur. Onlar sadəcə həmin kollecdə 7 il orta-ixtisas təhsil aldıqdan sonra elə eyni məktəbə müəllim vəzifəsinə işə götürülüblər. Belə deyək, şagird orta məktəbi bitirən kimi müəllimlik etmək hüququ qazanıb. Görünür, cənab “xan” həzrətləri kolecdəki bu biabırçılığı ört-basdır etmək üçün onu NDU-nun bir fakültəsinə çevirib ki, şagirdlər orta-ixtisas sertifikatı yox, ali məktəb diplomu alsın və bu biabırçılıq gözəgörünməz olsun.

Mənbəmizin iddiasına görə, ötən il ortaya çıxan bu saxtakarlığa baxmayaraq, Natəvan Qədimova hələ də öz vəzifəsinə davam edir: “Deyilənlərə görə, ondan “haqq”ını alıb vəzifəsində saxlayıblar. “Haqq”ın kimə çatdığını özünüz düşünün. Gəzən söz-söhbətlərə inansaq, Natəvan xanım ötənilki yoxlamalarda “Boz kardinal”a borclu qaldığından öz vəzifəsini qoruyur. Borcunu qaytardıqdan sonra onu təmtəraqla yola salacaqlar. Əgər bu informasiyalar doğrudursa, belə çıxır ki, hazırda mədəniyyət sahəsindən yığılan pullar Natəvan xanıma yox, “Boz kardinal” Azər Zeynalova gedir. Azər Zeynalov da təbii ki, o pulları tək xərcləmir. Böyük ehtimalla “qazanc”ının böyük hissəsini özündən yuxarıya ötürür”, - mənbəmiz qeyd edir.

Həmsöhbətimiz Natəvan xanımın hələ də nazir postunda oturmasını əsas gətirib soruşur: “Bəllidir ki, bu gün cənab sədr bir çox naziri ən müxtəlif bəhanələrlə işdən qovur. Bəs nəyə görə, Natəvan Qədimova adlı bu şəxsə bu qədər rüşvətin, saxtakarlığın aşkarlanmasına baxmayaraq, “gözünün üstündə qaşın var” deyən yoxdur. Natəvan xanımın arxasında kim var?”.

Ümidvarıq ki, mədəni “Qara Pişik”in bu haqlı suallarına Naxçıvan rəhbərliyi aydınlıq gətirəcək.