Berlin Rusiyanın aktivlərinin Ukraynanın xeyrinə müsadirə olunmasının qəti əleyhinədir.

Ovqat.com-un məlumatına görə, Amerikanın  “The Wall Street Journal” (WSJ) bu barədə bildirib.

Nəşr iddia edir ki, Almaniya bunun presedent yaradacağından və İkinci Dünya Müharibəsində törətdikləri cinayətlərə görə onlara qarşı da yeni iddiaların qaldırılacağından çəkinir.

İkinci Dünya Müharibəsindən sonra Almaniyaya qarşı təzminat tələbləri onilliklər boyu davam etdirdi, bəzən qonşuları ilə münasibətləri pisləşdirdi. İkinci Dünya Müharibəsindən sonra Berlin Almaniyanın işğalçı müharibəsinə görə müttəfiq dövlətlərə və o zamankı Sovet İttifaqına təzminat ödədi. Almaniya 1952-ci ildən bəri Holokostdan sağ çıxanlara və onların ailələrinə 90 milyard dollardan çox yardım edib.

Bununla belə, son vaxtlar əlavə təzminat tələbləri yenidən səslənir. Polşa 2022-ci ildən bəri Berlindən 1,3 trilyon dollar, Yunanıstan isə 2019-cu ildən bəri 300 milyard dollardan çox təzminat tələb edib.

İtaliya məhkəmələri də son illərdə işğal qurbanlarının ailələrinə restitusiya ödənişləri təyin edib. Daha sonra bəzi İtaliya məhkəmələri Almaniyanın dövlət əmlakını, o cümlədən İtaliyadakı alman məktəblərinə və mədəni, tarixi və arxeoloji qurumlara məxsus daşınmaz əmlakı müsadirə etməyə cəhd göstəriblər.

"Berlin iddia edir ki, beynəlxalq hüquq vətəndaşların məhkəmələrdə xarici dövlətlərə qarşı iddia qaldırmasını qadağan edir və dövlət aktivlərini müsadirədən qoruyur. Lakin Berlin rəsmiləri deyirlər ki, Rusiya işində bu prinsipin pozulması Almaniyanın uzunmüddətli hüquqi mövqeyinə xələl gətirəcək", - WSJ yazır.

Almaniya həmçinin Rusiya aktivlərinin toxunulmaz qalmasını, müharibəni dayandırmaq və Rusiyanı işğal etdiyi Ukrayna ərazilərinin bir hissəsini verməyə təşviq etmək üçün istənilən danışıqlarda təsir vasitəsi kimi istifadə edilməsini istəyir.

“Pism” analitik mərkəzinin rəhbəri Slavomir Debski bildirib ki, Berlinin Rusiya aktivlərini ələ keçirməkdən imtina etməsinin digər səbəbi hələ də bu ölkədə fəaliyyət göstərən alman şirkətlərini qisasdan qorumaq istəyi ola bilər. Qərb şirkətlərinin Rusiya bazarını tərk etməsinin tərəfdarı olan “Rusiyanı tərk et” qrupu bildirir ki, orada hələ də 272 alman şirkəti fəaliyyət göstərir.

Bununla belə, Amerikanın Covington hüquq firmasının vəkili Bart Szewczyk bildirib ki, Berlinin təzminat işləri üçün presedent yaratmaqla bağlı narahatlığı əsassızdır.

“Qarşı tədbirlərin məntiqi açıq şəkildə yalnız beynəlxalq hüququn mövcud və davam edən pozuntularına aiddir, 80 il əvvəl baş verənlərə deyil,” - o deyib.

Almaniya kansleri Olaf Şols isə riskə getmək istəmir.