Zaman-zaman ölkənin müxtəlif qurumları barədə məlumatlar mətbuata sızdırılır və istimai rəy yaradılaraq qarşıda dayanan problemlərin həllinə çalışır. Sözsüz ki, ölkəmizin demokratikləşməsi, bir çox hallarda süründürməçiliyə məruz qalan vətəndaşların qarşılaşdıqları problemlərin həlli, cəmiyyətimizin inkişafı, sosial ədalətin bərpası baxımından mətbuatın bu istiqamətdə əvəzsiz rolu danılmazdır.

Bununla belə, KİV-in bu imkanlarından sui-istifadə halları da müşahidə olunmaqdadır. Bəzən yoxlanılmamış xəbərlərin ictimailəşdirilməsi, qurumlararası rəqabət və hesablaşlamaların media vasitəsilə aparılması kimi hallar da baş verir və cəmiyyətimiz, xüsusilə ittihamlara məruz qalanlar tərəfindən birmənalı qarşılanmır.

Bir neçə gün əvvəl mətbu orqanlarda SOCAR-ın Kompleks Qazma İşləri Tresti haqqında yayılan məlumatlar da bu qəbildən idi. Məlumatda Trestin rəhbərliyi barədə ciddi ittihamlar səslədirilmiş, müəssisə rəhbərinin adı korrupsiyada və sair əməllərdə hallandırılmışdı. Həmin ittihamlara müəssisə rəhbərliyinin cavabı isə özünü çox gözlətməmiş, “Report” İnformasiya Agentliyi vasitəsilə bəzi mətləblərə aydınlıq gətirilmişdir.

İctimai əhəmiyyətini və aktuallığını nəzərə alıb həmin cavabı Ovqat.com oxucularına təqdim edirik:

“Son günlərdə bir sıra kütləvi informasiya vasitələrində SOCAR-ın Kompleks Qazma İşləri Tresti ilə bağlı bəzi  iddialar yayılıb. İşə qəbul prosesində uyğunsuzluqlar, əməliyyat xərclərinin şişirdilməsi və s. haqqında qaldırılan həmin iddialarla bağlı “Report” informasiya agentliyi daha dəqiq və müfəssəl məlumat əldə etmək üçün SOCAR-a müraciət edib.

SOCAR-dan bildirilib ki, şirkətdə korporativ standartlardan kənarlaşma ehtimalı olan struktur çərçivələri və davranışlarla bağlı daimi araşdırmalar aparılır, şirkətin nüfuz və mənafeyinə ziyan vura bilən özbaşınalıq və qayda pozuntuları haqqında alınmış bütün siqnallar ciddi şəkildə yoxlanılır. Məhz bu səbəbdəndir ki, hələ 2012-ci ildə, şirkətin müasir korporativ fəaliyyət tərzinə keçid prosesinin bir hissəsi olaraq, SOCAR-ın daxili antikorrupsiya siyasəti qəbul olunub və onun həyata keçirilməsi üçün Risklərin İdarəedilmə Komitəsi yaradılıb, nüfuzlu beynəlxalq məsləhətçi şirkətlərin cəlb edilməsi ilə praktiki mexanizmlər müəyyən edilib. Bu tədbirlər çərçivəsində şirkət üzrə vahid qaynar xətt yaradılıb. SOCAR-ın rəsmi veb saytı, e-mail və digər əlaqə vasitələri ilə əməkdaşlarımız, eləcə də başqa maraqlı şəxslər müşahidə etdikləri qanunsuzluq, korrupsiya və buna bənzər hallarla bağlı anonim və ya açıq formada məlumatlarını araşdırılmaq üçün göndərə bilirlər və daxil olan müraciətlər yaradılmış xüsusi komissiya tərəfindən araşdırılır.

Hazırda mətbuatda müzakirə olunan məsələlər müvafiq yoxlama zamanı şirkət daxilində araşdırılıb, yekun nəticələr əldə edilib. Bununla bağlı bildiririk ki, 2017-ci il ərzində Kompleks Qazma İşləri Trestində (KQİT və ya Trest) Azərbaycan Respublikasının Əmək Məcəllləsinin 70-ci maddəsinin “b” bəndinə əsasən (işçilərin sayı və ştatların ixtisarı ilə əlaqədar olaraq), mətbuatda qeyd edilənlərdən fərqli olaraq, yalnız iki nəfər işdən azad edilib. Onlardan biri səhhətində problem olduğu üçün, əmək haqqının 5 misli məbləğində müavinət alaraq əmək müqaviləsinə xitam verilməsini özü istəyib. Digəri- Arif Qəmbərov isə ştat ixtisarı ilə əlaqədar ona təklif olunan müxtəlif vəzifələrdən imtina edib, Trest qarşısında qanunsuz şərtlər irəli sürüb, ona edilən təkliflərdən bir neçə dəfə imtina etdiyi üçün, onunla bağlanmış əmək müqaviləsi, AR ƏM-nin tələblərinə ciddi əməl olunmaqla ləğv edilib. Həmin şəxsin müvafiq məhkəməyə təqdim etdiyi iddia da, qanunsuz olduğu üçün rədd edilib.

KQİT-nin fəaliyyəti ilə bağlı olan digər iddia isə əməliyyat xərclərinin şişirdilməsidir. Həmin iddia da artıq araşdırılıb. 1533, 1535, 1779, 37 saylı quyularla bağlı mətbuatda qeyd olunan məqamlar qarışıqdır və həqiqəti əks etdirmir. Belə ki,1533 saylı quyu 05.05.2008-ci il tarixdə, 1535 saylı quyu 28.12.2007-ci il tarixdə, 37 saylı quyu 04.03.2008-ci il tarixdə, 1779 saylı quyu isə hətta Trest yaranmamışdan xeylı əvvəl istismara təhvil verilib. Beləliklə, aparılmış araşdırmalardan məlum olub ki, bu iddiaların bir qismi ümumiyyətlə trestin fəaliyyət dövrünə belə aid edilə bilməz. Quyular təhvil verildikdən sonra dəfələrlə audit yoxlamalarından keçib və bu yoxlamalar nəticəsində görülmüş işlərin səmərəsi ilə bağlı heç bir şübhə yaranmayıb.

Qeyd edək ki, 2011-ci ildən etibarən SOCAR-da işə qəbul, yerdəyişmə, karyera yüksəlişi həmin il yaradılmış İnsan Resursları Departamenti tərəfindən tam şəffaf, obyektiv şəkildə, müsabiqə əsasında, mərkəzləşmiş qaydada həyata keçirilir. KQİT-də işləyən əməkdaşların səriştəliklərinə dair, o cümlədən KQİT rəhbərinin müşaviri ilə bağlı peşəkarlıq baxımından uyğunsuzluq iddiaları həmin Departamentdə araşdırılıb, bu iddiaların da həqiqətə uyğun olmadığı aşkar edilib. Azərbaycan Neft və Sənaye İnstitutunu bitirmiş Ədalət İmaməliyev uzun illər qazma sahəsində rəhbər vəzifələrdə çalışıb və “Əməkdar Mühəndis” fəxri adına layiq görülüb.

Ümumiyyətlə, qeyd olunmalıdır ki, SOCAR-ın antikorrupsiya siyasəti şirkətin korporativ mənafeyini qorumaq üçün nəzərdə tutulan mexanizmlərdən biridir. SOCAR korporativ hədəflərinə zidd olan davranışları aşkar edib, onların qarşısının almağı səmərəli fəaliyyətin təməl prinsiplərindən hesab edir. Bununla belə bu məqsəd üçün yaradılmış şikayət mexanizmləri insanlar tərəfindən bir çox hallarda öz aralarında olan şəxsi hesablaşmalar üçün sui-istifadə olunur. Bəzən şəxsi zəmində həmkarlarından razı olmayan şəxslər öz mənafeləri üçün şirkətin korporativ mənafeyini bəhanə gətirir, qaynar xəttə əsassız ittihamlar göndərirlər. Buna baxmayaraq, şirkətin korporativ mənafeyini mütləq dəyər kimi əsas tutaraq, Risklərin İdarəedilməsi Komitəsi qaynar xətt vasitəsi ilə daxil olan bütün şikayət, irad və təklifləri bundan sonra da ciddi şəkildə araşdırmaqda davam edəcək, tutarlı dəlillərlə əsaslandırılan bütün ittihamlarla bağlı müvafiq tədbirlər görüləcək”.