2001-ci i idi. Naxçıvan Dövlət Unuversitetinin  birinci kurs tələbəsi idim. Bir gün “Şərq qapısı” qəzetində rəhmətlik Məmməd Məmmədov Naxçıvan Dövlət Universitetinin “Jurnalistika” ixtisasının tələbələrinin iştirakı ilə dəyirmi masa təşkil etdi. Həmin dəyirmi masadakı çıxışım qəzetdə dərc olundu. Bir neçə gündən sonra müəllimlərim mənə dedi ki, sənin haqqında Ali Məclisdən maraqlanırdılar. Həmin vaxtdan təqribən 5-6 ay keçdi. Tələbə yoldaşlarımızla birlikdə qəzet nəşr etdirmək fikrinə düşdük. Məsləhət almaq üçün Ali Məclisin Mətbuat xidməti ilə əlaqə saxlamaq məsləhət görüldü. Bu işi də tələbə yoldaşlarımız mənə həvalə etdi. Və mən tələbə yoldaşlarımızın yanında Ali Məclisin Mətbuat və ictimaiyyətlə əlqələr şöbəsinin müdiri Hüseyn Əsgərova zəng etdim. Özümü təqdim etmədən niyyətimiz barədə danışdım. Məni diqqətlə dinlədi və axırda adımı, soyadımı soruşdu. Ad-soyadımı söylədikdən sonra  mənə dedi ki, “Şərq qapısı” qəzetindəki çıxışını bəyəndim. Muxtar respublikanın kütləvi informasiya vasitələri ilə əməkdaşlıq elə, onlara tapşırmışam. İstəyirdim deyəm ki, sizə müraciət etdiyimiz məsələyə necə baxırsınız? Sözünə davam edərək dedi ki, tələbə yoldalarına de, getsinlər universitetdə divar qəzeti çıxarsınlar. Onunla ilk tanışlığımız belə olub.

Həm tələbəlik dövründə, həm də sonrakı dövrlərdəki uğurlarımın əksəriyyətində onun böyük payı vardır. Tale elə gətirdi ki, 2008-2010-cu illərdə Ali Məclisdə Hüseyn Əsgərovun rəhbərlik etdiyi şöbədə çiyin-çiyinə  çalışdıq. Bu dövrdə ondan çox şey öyrəndim. Ancaq ən böyük qazancım mənə zorla oxutdurduğu kitablardır, məndə daimi mütaliə vərdişi yaratmasıdır.

Bax bu gün həmin KİŞİNİN doğum günüdür.

Hüseyn Əsgərov tanınmış ictimai xadim, Azərbaycanın sanballı qələm sahiblərindən biridir. Hüseyn müəllim uzun illər çalışdığı Naxçıvan televisiyasında bir məktəb yarada bilib. O Naxçıvan Muxtar Respublikası Ali Məclisinin Mətbuat və ictimaiyyətlə əlaqələr şöbəsinin müdiri vəzifəsində çalışdığı dövrdə muxtar respublika mətbuatının inkişafına dəyərli töhfələr verib. Son 15  ildə Naxçıvanda kütləvi informasiya vasitələrinə Hüseyn Əsgərovun yetişdirdiyi kadrlar rəhbərlik edib. Onun yetişdirdiyi onlarla jurnalist bu gün ölkə mətbuatında əsas söz sahiblərindəndir.

Doğum gününüz mübarək olsun əziz müəllimim! Sizə uzun ömür, cansağlığı və yeni-yeni yaradıcılıq uğurları arzulayıram. Sizin öyrətdiklərinizlə irəli gedirik. Var olun.
Məqalə Tural Səfərovun Focebok səhifəsindən götürülmüşdür.