Məlum olduğu kimi bu gün “Kütləvi informasiya vasitələrinin əməkdaşlarına mənzillərin verilməsi qaydaları və şərtləri”nin açıqlanıb. Burada göstərilib ki, dövlət orqanlarının mətbuat xidmətlərinin əməkdaşları ilə bağlı da Komissiyaya müvafiq şərtlərə və qaydalara uyğun təqdimatlar verilə bilər. Movqe.az bu iki məqamla bağlı jurnalistlərə qaranlıq qalan, sosial şəbəkələrdə yaranan suallara aydınlıq gətirib.

Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru,  jurnalistlərin mənzillərlə bağlı müraciətlərini qəbul edəcək Komissiyanın sədri Vüqar Səfərli Movqe.az-a açıqlamasında bildirib ki, dövlət orqanlarının mətbuat xidmətlərinin əməkdaşları barədə onların çalışdıqları qurumun rəhbərliyi tərəfindən Komissiyaya təqdimat verilə bilər: "Amma mütləq həmin mətbuat xidmətinin əməkdaşının KİV-lərdə ən azı fasiləsiz 10 il fəaliyyəti, eləcə də, ən son çalışdığı redaksiyada ən azı fasiləsiz 3 il stajı olmalıdır.  Qayda və şərtlərdə necə göstərilibsə biz sənəd qəbulu zamanı müraciətlərin bu tələblərə cavab verib-verməməsinə diqqət edəcəyik. Əgər müraciət edən jurnalistin sənədləri göstərilən tələblərə uyğun deyilsə, onu Prezident  Adminstrasiyasına göndərməyin heç bir mənası yoxdur. Ona görə də, jurnalistlər, dövlət orqanlarının mətbuat xidmətlərinin əməkdaşları bu tələbi nəzərə alaraq Komissiyaya sənəd təqdim etsinlər".

Zülfiyyə QULUYEVA