Bu gecə saat 3 radələrində Bakının mərkəzində güclü partlayış olub.
 
Ovqat.com xəbər verir ki, partlayış el arasında “Torqovi” kimi tanınan Nizami küçəsində “Location” adlı gecə klublarından birində qeydə alınıb.
 
Partlayış zamanı onlarla insanın xəsarət aldığı bildirilir. İlkin məlumatlara görə, 24 nəfər müxtəlif xəstəxanalara yerləşdirilib. Yaralıların əksəriyyətində yanıq halları müşahidə olunur. Hadisə nəticəsində ölənlərin olduğu da bildirilir. 
 
Hadisə zamanı mülki obyektlərə və avtomobillərə ciddi ziyan dəyib.
 
Hadisə yerinə hüquq-mühafizə orqanlarının, Fövqəladə Hallar Nazirliyinin əməkdaşları və təcili yardım cəlb edilib. Fövqəladə hallar nazirinin müavini general-leytenant Etibar Mirzəyev və Baş Prokurorun birinci müavini Elçin Məmmədov da hadisə yerində incələmələrə başlayıb. 
 
İlkin versiyaya görə, hadisə balonunun partlaması nəticəsində baş verib. Hadisənin Ramazan gecəsi əyləncə klubunda baş verməsi başqa versiyaları da ağla gətirir.

Baş Prokurorluğun yaydığı rəsmi məlumata görə, hadisədə ən azı 1 nəfər ölüb, 31 nəfər ilə yaralanıb.
 
"Hazırda prokurorluq, Daxili İşlər, Fövqəladə Hallar Nazirliyi və digər aidiyyəti orqanların nümayəndələri hadisə yerindədilər. Prokurorluğun müstəntiqləri və kriminalistləri tərəfindən zəruri istintaq hərəkətləri həyata keçirilir.

İlkin məlumata əsasən, hadisə nəticəsində 1 nəfər ölüb, 31 nəfər isə müxtəlif dərəcəli bədən xəsarətləri alıb.
İctimaiyyətə əlavə məlumat veriləcək", - Baş Prokurorluğun məlumatında deyilir.