“Naxçıvanda baş verənlər, elə-obaya, dinə sığışası məsələ deyil. Harınlamış, milli mənsubiyyətini unutmuş vicdanasızlar Muxtar Respublikanı tamamilə Bakının nəzarətindən çıxarmağa nail olublar. Elə faktlar var ki, adam onları eşidəndə ayağının altından yer qaçır”.

“AzPolitika.info” xəbər verir ki, bunları politoloq Qabil Hüseynli “LAF TV”-yə müsahibəsində deyib. “Qiyabi yolla ibtidai sinif müəllimliyini bitirmiş, ömründə bir kitab belə oxumamış şəxsin Naxçıvanda belə hərəkətlərini eşidəndə adamın nitqi quruyur”,- o əlavə edib.

Qabil Hüseynli təəssüflə bildirir ki, illər uzunu Naxçıvan rəhbərliyi nəzarətsiz qalıb: “Bakı hara baxırdı, hadisələrin bu cür mənfi istiqamətdə inkişaf etməsini gözləyirdi? Onların qabağını ən azı 10 il bundan qabaq almaq lazım idi. Bu qədər gecikməyə dəyərdimi? Doğrudur, koronavirus, müharibə aranı qatdı. Amma bu vicdansızlar bilirlər ki, Vətən nədir, torpaq nədir, torpağı azad etmək nədir?! Bəli, Rusiyanın “5-ci kolonu” idilər. Rus dilində bir kəlmə bilməsə də, onun daydayısı Ramiz Mehdiyev ruscanı çox yaxşı bilirdi, həyat yoldaşı da rusca əla danışırdı. Onların təlimatı ilə bu baş verənlər həyata keçirilib. Naxçıvan bayrağı hazırlanıb... Muxtar Respublikada yığılan gömrük və vergi rüsumlarının hamısı bir klanın cibinə axıb. Ən minimal hesablamalar göstərir ki, mənimsəmənin ümumi miqdarı 100 milyard dollardan çoxdur. Baxın, görün, orada necə dərəbəylik imiş. Başıboş bir adam xalqımızın ürəyi olan böyük bir ərazidə necə böyük bir özbaşınalıq yaradıbmış. Əhalini köçməyə məcbur edirmiş...”

Qabil Hüseynlinin sərt ittihamlarla dolu olan müsahibəsinin davamı ilə videomaterialda tanış olmaq olar: