Qırğızıstan və Tacikistan rəsmiləri ortaq sərhədlərin müəyyənləşdirməyə başlamaq haqqında qərar qəbul ediblər.
 
Ovqat.com-un bildirdiyinə görə, bu barədə Qırğızıstan hökumətinin mətbuat xidməti məlumat verib.
 
Məlumatda bildirilir ki, Qırğızıstan və Tacikistan yetkililəri dövlət sərhədindəki münaqişənin sülh yolu ilə həll edilməsinin zəruriliyi barədə fikir birliyinə gəliblər.
 
İclasdan sonra məzmunu açıqlanmayan ortaq bir protokol imzalanıb.
 
Xatırladaq ki, münaqişə İsfara çayının yuxarı axınındakı “Qolovnoy” supaylama məntəqəsi ərazisində başlayıb - hər iki ölkə buranı öz əraziləri hesab edirlər. 
 
Odlu silahların istifadə olunduğu qarşıdurmalar daha sonra orada Qırğızıstan və Tacikistan hərbçiləri arasında toqquşmalara çevrilmişdi. Qarşıdurmaların ən çox zərər görən isə qırğızlar olmuşdu. Rəsmi məlumatlara görə, indiyədək 34 qırğız ölmüş, 178 qırğız isə yaralanmışdı. Tacikistanın rəsmi məlumatına görə isə bu qarşıdurmada 15 vətəndaşını itirmişdir.
 
Məlumata görə, iki dövlət arasında sərhədlərin 40%-dən çoxu mübahisəlidir və bu fakt məsələnin sülh yoluyla həllini çətinləşdirir.