“Rusiyada Vladimir Putin iqtidardan getdikdən sonra heç nə dağılmayacaq”.
Musavat.com xarici agentliklərə istinadən xəbər verir ki, bu barədə RF prezidentinin özü “NBC” kanalına verdiyi müsahibədə bildirib.

Onun sözlərinə görə, ölkədə hazırda çoxlu problemlər olsa da, situasiya fərqlidir. O, yüksək postu tərk etməsi halında şəxsi müdafiəsi ilə bağlı suallara cavab verməyib və bu mövzunu üçüncü dərəcəli məsələ adlandırıb.

“Mən öz taleyimi ölkənin qədəri ilə elə bağlamışam ki, həyatda mənim üçün Rusiyanın möhkəmləndirilməsindən başqa heç bir vacib iş yoxdur”,-deyə o qeyd edib.

Xatırladaq ki, Rusiya mətbuatında Vladimir Putinin yerinə keçəcək namizədlər arasında ən çox baş nazir Mixail Mişustin, müdafiə naziri Sergey Şoyqu, Xarici Kəşfiyyat Xidmətinin direktoru Sergey Narışkin, keçmiş baş nazir Dmitri Medvedev, Tula vilayətinin qubernatoru Aleksey Düminin adı hallanır.