Keçmiş NATO baş katibi Yens Stoltenberq gəncliyində SSRİ kəşfiyyatının diqqət mərkəzində olub və ona "Steklov" ləqəbi verilib.

Musavat.com xəbər verir ki, bu haqda Rusiya Baş Kəşfiyyat İdarəsinin veteranı, Hərbi-Diplomatik Təhlil və Qiymətləndirmə Mərkəzinin rəhbəri Vladimir Vinokurov "RIA Novosti"yə müsahibəsində deyib.

Qeyd edək ki, NATO-nun keçmiş baş katibi oktyabr ayında "Financial Times" qəzetinə müsahibəsində Norveçdə Sovet Dövlət Təhlükəsizlik Komitəsi (KQB) ilə əvvəlki əlaqələrini açıq şəkildə etiraf edib. Onun sözlərinə görə, 1980-ci illərdə bir neçə dəfə KQB nümayəndələri ilə görüşüb. Stoltenberq həmin dövrdə Norveç əks-kəşfiyyatı ilə əməkdaşlıq çərçivəsində "Kirilov" soyadlı bir agenti ələ keçirməyə çalışsa da, bu cəhd uğursuzluqla nəticələnib.