“Böyük Britaniya, ABŞ, İtaliya və Türkiyə Ukraynanın təhlükəsizliyinin qarantı olmağa hazır olduqlarını nümayiş etdirirlər, lakin hələ də heç birindən yekun cavab yoxdur”.
 
Ovqat.com xəbər verir ki, Ukrayna Prezidenti Vladimir Zelenski “Ukrayinska Pravda” onlayn mediasına müsahibəsində belə deyib.
 
Onun sözlərinə görə, sözügedən dövlətlərdən başqa Avropa İttifaqı də bu məsələdə Kiyevə dəstək verə bilər.
 
“Mən Ursula (Avropa Komissiyasının prezidenti Ursula von der Leyen), Şarlz Mişel (Avropa Şurasının rəhbəri), Fransa, Almaniya ilə ayrıca danışdım. Bu formatda ilkin söhbətə beş nəfərlik qrup - Böyük Britaniya, ABŞ, Almaniya, Fransa, Polşa rəsmiləri də qatılacaq. Sonra başqa ölkələr də onlara qoşulacaq”, - deyə Zelenski bildirib.
 
Nəşrin yazdığına görə, Zelenski hesab edir ki, Ukraynanın silah tədarükü və ya işğalçı ölkəyə qarşı sanksiyalarla bağlı problemi olmayacaq, lakin hərbi komponentlərlə bağlı müəyyən problemlər yaşana bilər.