Uzun müddət "Benfika" klubunda oynayan Eysebio Portuqaliya yığmasının tərkibində 1966-cı il dünya çempionatının bürünc medalını qazanıb. 11 dəfə Portuqaliya çempionu olan idmançı 1965-ci ildə Avropanın ən yaxşı futbolçusu seçilib. 1962-cı ildə "Benfika" ilə Çempionlar Kubokunun qalibi olub. Portuqaliya yığmasının tərkibində keçirdiyi 64 oyunda 41 qol vurub.

Sürətli və texniki oyununa görə "Qara pantera" ləqəbi almış Eysebio iki dəfə "Qızıl buts" mükafatına layiq görülüb.

Eysebio 5 yanvar 2014-cü ildə vəfat etmişdir.

Əməkdar incəsənət xadimi, Böyük şair Ələkbər Salahzadə 1941-ci ildə Quba rayonunun Qonaqkənd qəsəbəsində doğulub.Mərhum şairin bu şeiri günümüzlə necə səsləşir.Futbol üzrə dünya çempionatının keçirildiyi indiki ərəfədə "Eysebio sevinci" şeiri ilə həm mərhum şair Ələkbər Salahzadəni, həm də ulduz futbolçu Eysebionu yad edir, "Allah ruhlarını şad eləsin!" deyirik.

EYSEBIO SEVINCI
 Afrikadan yüyürüb
               Avropada
                    topa vurduğu zərbə
                    açır qapıları,
                    yırtır torları...
 Sevincdən kükrəyərək,
 Sevincdən şığıyaraq
 qara qollarını atmaq istəyir
             Mozambikin üstünə!
 Sevinc girib qoluna,
 qara sevinc çırpınır,
 qara sevinc parıldayır üz-gözündə
 saçlarında, əllərində, ayaqlarında...
 Yiyəsini aşıb-daşır,
 Yiyəsini uçurur
 bir ürəyə sığışmaz sevinc,
 qara vətənli sevinc,
 qara yataqlı sevinc...
 Çömçə ayaqları
 qarışdırır buxarlanan nəhəng qazanı.
 Stadion uğuldayır,
 stadion qaynayır!
 Sevinci
 Gözündə inci-inci
 Gözümdən keçir...
 Televizor ekranında
 qapı titrəyişi,
 Afrikadan yüyürüb
 Avropada
 topa vurduğu zərbə...

1968.
"Beş yarpaq" kitabından