“Artıq bir neçə müddətdir ki, AMEA-nın prezidenti Ramiz Mehdiyevin fəaliyyətilə bağlı tənqidlər, müxtəlif formatda müzakirələr ölkə gündəmini qısa fasilələrlə tutmaqdadır. Son dövrdə baş verən hadisələr isə AMEA-dakı xaosun artıq böhran nöqtəsinə çatdığını və mövcud problemin birdəfəlik, kökündən həlli üçün qəti addımların atılmasının zəruriliyini göstərmiş oldu. Həqiqətən də bu gün Azərbaycan elmi özünün inkişaf dinamikasına görə istənilən digər sahədən çox geri qalır. Bunun da əsas səbəbi, əlbəttə ki, ölkənin əsas elm məbədi sayılan Milli Elmlər Akademiyasında gedən reqressiv proseslər, rəhbərlik tərəfindən inkişafı əngəlləyən qərarların davamlı olaraq qəbul edilməsi, əsaslandırılmamış və özünü doğrultmayan “islahatlar”, gənc və perspektivli kadrların elm sahələrindən müxtəlif bəhanələrlə uzaqlaşdırılmasıdır”.

Bu sözləri “AzPolitika.info”-ya verdiyi açıqlamasında Azərbaycan Respublikası Milli Məclisinin deputatı Kamaləddin Qafarov deyib.

Deputatı Kamaləddin Qafarov onu da qeyd edib ki, AMEA prezidentinin onun fəaliyyətini haqlı olaraq tənqid edənlərə, xüsusilə də deputatlara qarşı təhqiramiz ifadələr işlətməsi yolverilməzdir və bu, əslində, Azərbaycan xalqını təhqir etmək anlamına gəlir: “Əlbəttə ki, yaranmış vəziyyətdə akademik Ramiz Mehdiyevin onun fəaliyyətini tənqid edən deputatlara qarşı sərgilədiyi mövqeyə də münasibət bildirməmək mümkün deyil. İlk növbədə, birmənalı olaraq qeyd etmək lazımdır ki, Azərbaycan Respublikası Milli Məclisinin deputatı adını daşıyan şəxsə qarşı mətbuatda təhqir dolu çıxışlar edən istənilən şəxs eyni zamanda həmin deputatın seçicilərini, yəni Azərbaycan xalqını təhqir etmiş olur. Buna isə nə keçmiş, nə də indiki xidmətlərindən (əgər belə xidmətlər olubsa belə) asılı olmayaraq heç kimin haqqı yoxdur. Digər tərəfdən də, bu və ya digər deputatın Milli Məclisə seçilməsini şübhə altına qoymaqla Ramiz Mehdiyev seçki nəticələri Konstitusiya Məhkəməsinin qərarı ilə təsdiqlənmiş Parlamentin legitimliyini şübhə altına almağa cəhd göstərmiş olur. Bu isə artıq AMEA rəhbərinin ölkənin elm sahəsini inkişafdan qoymağa yönəldilən cəhdlərinin arxasında daha təhlükəli siyasi motivlərin durduğuna dair iddiaların əsaslı olduğu anlamına gəlir. İstənilən halda, bu gün Azərbaycanda bütün digər sahələrdə olduğu kimi, elm sahəsində də ciddi islahatlara ehtiyac var və bu islahatların effektivliyi yalnız AMEA prezidentinin istefasından, yaxud dəyişdirilməsindən sonra əldə oluna bilər”.