Son günlər 2006-cı il may ayında İran Azərbaycanının şəhərlərində keçirilən etiraz aksiyalarının ildönümü yaxınlaşdıqca, milli fəallar bu günü divarlara şüarlar yazıb xalq arasında broşürlər paylayaraq və şəhərlərin küçələrində plakatlar asmaqla qarşılayır.

Sosial mediada yayılan görüntülərə görə, Təbriz, Urmiyə və Sulduz şəhərlərində milli fəallar 2006-cı ilin mayında İran Azərbaycanının şəhərlərində baş vermiş kütləvi etirazların ildönümünü müxtəlif fəaliyyətlərlə, o cümlədən divar boyama və plakatlar asmaqla xalqa xatırladırlar.

Azərbaycan şəhərlərində milli fəalların xalq arasında yaydıqları broşürlərdə "azadlıq, ədalət, milli hökumət" şüarı yer alıb. Həmçinin həmin broşürlərdə İslam Respublikası hökumətinə qarşı etiraz etmək üçün insanları dinc etiraz aksiyaları keçirməyə dəvət edən "1 xordadda haqqını almağa ayağa qalx" şüarı da dərc edilib.

Son günlər Azərbaycanın müxtəlif şəhərlərində milli fəallar Təbriz, Urmiyə, Marağa, Çaharburc, Qoşaçay, Kərəc, Qum və Binab şəhərlərində İslam Respublikasına qarşı etiraz olaraq, vərəqələr paylayıblar. Həmin vərəqələrdə xalqdan etiraz aksiyası keçirməyə dəvət olunub.

Son yayılan məlumata görə, Ərdəbil fəalları da İran Azərbaycanının digər şəhərlərindəki kimi 2006-cı ilin mayındakı kütləvi etirazların ildönümü münasibətilə vərəqələrin paylanması dalğasına qoşulduğu bildirilir.

2006-cı ilin may ayında türklər "İran" adlı dövlət qəzetində yayımlanan türklərə qarşı aşağılayıcı karikaturalı məqaləyə etiraz olaraq, İran Azərbaycanının müxtəlif şəhərlərində, genişmiqyaslı etiraz aksiyaları keçirdilər. İran Azərbaycanının bəzi şəhərlərində keçirilən həmin etiraz aksiyaları, bir neçə etirazçının təhlükəsizlik qüvvələri tərəfindən öldürülməsi ilə nəticələnmişdi.

amerikaninsesi.org