İmişli Rayon İcra Hakimiyyətinin (RİH) sabiq başçısı Vilyam Hacıyevin həyat yoldaşı Cülyetta İbrahimova və oğlu Məhəmməd Hacıyevin müsadirə olunmuş əmlaklarının geri qaytarılması üzrə qərardan verilmiş kasasiya şikayətinə baxılıb.

Musavat.com xəbər verir ki, Ali Məhkəmədə hakim Əziz Seyidovun sədrliyi ilə keçirilən prosesdə elan olunan qərara əsasən, maraqlı şəxs və eyni zamanda “Xəzər-222’’ MMC-nin təsisçisi Cülyetta İbrahimova və vəkili Yusif İsmayılov tərəfindən birgə verilmiş, maraqlı şəxs Məhəmməd Hacıyev və vəkili Yusif İsmayılov tərəfindən birgə verilmiş, zərərçəkmiş hüquqi şəxs İmişli RİH-nin nümayəndəsi və vəkili Mirzə Xankişiyev tərəfindən verilmiş kasasiya şikayətləri təmin edilməyib. Bakı Apellyasiya Məhkəməsinin 30 noyabr 2022-ci il tarixli qərarı dəyişdirilmədən saxlanılıb. Qeyd edək ki, Cülyetta İbrahimova 5 milyon 218 min manatlıq mənzilləri və 2 minik avtomobilinin, Məhəmməd Hacıyev isə 126 min manatlıq “Land Rover” markalı avtomobilin müsadirədən azad olunmasını istəyirdilər.

3 il əvvəl, 2020-ci il mayın 5-də məhkəmənin qərarı əsasında Dövlət Təhlükəsizliyi Xidməti tərəfindən Vilyam Hacıyevin xidməti və yaşadığı ünvanlarda əməliyyat-istintaq tədbirləri həyata keçirilib. Daha sonra o, həbs edilib. İstintaq orqanı tərəfindən Vilyam Hacıyevin barəsində Cinayət Məcəlləsinin 179.3.2-ci (külli miqdarda mənimsəmə və ya israf etmə, 308.1-ci (vəzifə səlahiyyətlərindən sui-istifadə, yəni vəzifəli şəxsin xidməti vəzifələrinin icrası ilə əlaqədar özü və ya üçüncü şəxslər üçün qanunsuz üstünlük əldə etmək məqsədilə öz qulluq səlahiyyətlərindən qulluq mənafeyinə qəsdən zidd olaraq istifadə etməsi və ya qulluq mənafeyi tələb etdiyi halda istifadə etməməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyətin və ya dövlətin qanunla qorunan mənafelərinə mühüm zərər vurduqda), 311.3.3-cü (rüşvət alma (passiv rüşvətxorluq), külli miqdarda törədildikdə) və 313-cü (vəzifə saxtakarlığı) maddələri ilə ittiham elan olunub. Bakı Ağır Cinayətlər Məhkəməsinin hökmü ilə Vilyam Hacıyev 12 il müddətinə azadlıqdan məhrum edilib. Hökmdə qeyd edilib ki, təqsirləndirilən şəxsin 6 milyon 300 min manatlıq əmlak və pulu dövlət nəfinə müsadirə olunsun. Hökmə əsasən, sabiq icra başçısının ailə üzvlərinin adına rəsmiləşdirilmiş 5 milyon 344 min manatlıq əmlakı da dövlət nəfinə müsadirə olunub. Bakı Apellyasiya Məhkəməsi hökmü dəyişdirmədən qüvvədə saxlayıb. Bundan sonra Vilyam Hacıyevin ailə üzvləri həmin qərardan kasasiya şikayəti vermişdilər. Bu gün isə Ali Məhkəmə həmin şikayəti təmin etmədi.