“Siyasi dairələrdəki hərarət Türkiyə iqtisadiyyatının hazırki durumunu çətinləşdirib. Son günlər lirənin ABŞ dollarına nəzərən dəyər itirməsi Türkiyə mənşəli qiymətli kağızlara və borc öhdəliklərinə də təsirsiz ötüşməyib. Hazırda 1 dollar 4,84 lirə səviyyəsində qərarlaşıb, amma bu hələ də son deyil. Bu gedişlə lirə iyunun 24-də keçiriləcək seçkilərədək təzyiq altında olacaq”.

Strateq. az xəbər verir ki, bu barədə iqtisadçı ekspert Qubad İbadaoğlu bildirib. Ekspertin sözlərinə görə,  lirənin dəyər itirməsi Azərbaycana da təsirsiz ötüşməyəcək: “Türkiyə idxalda Azərbaycanın başlıca tərəfdaş ölkəsidir. Deməli, onsuz da artan idxal bu səbədən də daha da çoxalacaq və Azərbaycandan bu ölkəyə valyuta axınını sürətləndirəcək. Bununla yanaşı, Türkiyədə Azərbaycan mənşəli əmlak və sərmayələr də dəyər itirə bilər”.

Q.İbadoğlu daha sonra qeyd edib ki, bu günlərdə ABŞ-ın İran vətəndaşı olan 5 nəfəri ünvanlı sanksiya siyahısına salması, son günlər sabitləşən İran milli valyutasının (hazırkı kurs 1 $/ 42,105.11 Rialdir) dəyərsizləşməsini sürətləndirəcək. “Əgər mövcud proseslər Rusiyada da müşahidə olunarsa, (hazırkı kurs 1 $/ 61,69 Rubldur) onda əsas ticarət tərəfdaşları olan ölkələrdən Azərbaycana idxalın artımı fonunda manata kənar təzyiqlər də çoxalacaq. Belə təsirlər həmin ölkələrə ixracatın həcminin aşağı düşməsini də şərtləndirəcək. Odur ki, Mərkəzi Bank və Gömrük Komitəsi Azərbaycanın idxalda əsas ticarət tərəfdaşı olan ölkələrdə son günlər müşahidə olunanlara adekvat munasibət bildirməli və preventiv tədbirlər vasitəsilə real effektiv məzənnənin təsirlərini tənzimləməlidir”-de Qubad İbadoğlu vurğulayıb.

Strateq.az