ABŞ-ın kommersiya neft ehtiyatları 20-26 may həftəsində 6,4 mln. barel və ya 1,2% azalaraq 509,9 mln. barelə geriləməsinə baxmayaraq, neft qiymətləri iyunun 1-də 1,5%-ə yaxın azalaraq 50 dollar/barelə düşüb. 

"Report"un "Forexpf.ru" saytına istinadən xəbər verir ki, neft qiymətlərinin ucuzlaşmasına səbəb dünən, iyunun 1-də ABŞ Prezidenti Donald Trampın iqlim dəyişikliyi ilə mübarizə anlaşmasından çıxması olub. ABŞ-ın qərarı bu ölkədə neft hasilatının genişlənməsi ilə bağlı gözləntiləri artırıb. Bu da öz növbəsində onsuz da gərgin olan neft bazarında narahatlıqları bir qədər də artırıb.

"Report"un analitik qrupu "Brent" markalı neftin qiymətinin 43-45 dollar/barelə qədər azala biləcəyini proqnozlaşdırır. Normal şərtlər altında neftin qiyməti ilin sonuna qədər 42-52 dollar/barel diapazonunda dəyişə bilər. 

Qeyd edək ki, ABŞ-da neft hasilatı hesabat həftəsində 22 min barel/gün və ya 0,24% artaraq 9,342 mln. barel/günə çatıb.