İraqın "Həşd Şabi" hərəkatı əl-Ənbar vilayətində İŞİD terrorçu qruplaşmasına qarşı hərbi əməliyyat keçirib. 
Ovqat.com xəbər verir ki, hərbi əməliyyat bu gecə İŞİD-in əsasən şiə türmkənlərin yaşadığı Duzxurmatu bölgəsinə etdiyi hücumdan sonra başlayıb.
İŞİD hücumu nəticəsində 3 nəfərin öldüyü və 5 nəfərin yaralandığı bildirilir. Hücum Həşdi Şabi hərbi birləşməsinə qarşı həyata keçirilib və İraq könüllülərinin buna cavabı sərt olub. Duzxurmatunun bağlı olduğu Səlahəddin vilayətindən sünnilərin qalası sayılan əl-Ənbar bölgəsinə qədər geniş miqyaslı hərbi əməliyyatlara başlayan Həşdi-Şabi qüvvələrinin xeyli sayda İŞİD-çini zərərsizləşdirdiyi və ələ keçirdiyi xəbər verilir.
Ələ keçirilən İŞİD-çilər arasında təşkilatın əl-Ənbar “əmiri” də var. “Əmir” barəsində cinayət işi başladılıb və onu ağır cəza gözləyir. 
Həşd Şabi-nin sözügedən əməliyyatına komandirlik edən Qasim Müslihin bildirdiyinə görə, zərərsizləşdirilən və ələ keçirilən terrorçular təhlükəsizlik qüvvələrinə qarşı terror aktları təşkil ediblər.
Qeyd edək ki, İraq təhlükəsizlik qüvvələri 9 dekabr 2017-ci il tarixində İŞİD-ə qarşı tam qələbə qazandıqlarını bəyanlamışdılar. Üzərindən 2 il yarım zaman keçməsinə baxmayaraq, İŞİD hücumlarının hələ də sürməsi qələbənin vaxtından əvvəl elan olunması barədə qənaətləri gücləndirir.