Rusiya “Qafqaz-2020” təlimi keçirərkən əslində Türkiyəyə və Azərbaycana “Qafqazın sahibi mənəm” mesaj verirdi. Təlim iştirakçılarından birinin də Ermənistan olması istər-istəməz ağla bir sualı gətirirdi: Görəsən, Azərbaycan Dağlıq Qarabağ əməliyyatlarına başlayarsa, Rusiya Ermənistana hərbi yardım edərmi?
 
Yəqin ki, “Qafqaz-2020” təlimlərinə qatılan erməni hərbçiləri bu suala 100% əminliklə “bəli” gözləntisi içində idilər. Üzərindən bir gün keçməmiş Azərbaycana bütün sərhəd boyu hücumları da, görünür, bu əminlikdən qaynaqlanmışdı. Amma Azərbaycanın heç tərəddüd etmədən ani əks-hücumla erməni təcavüzə cavab verməsi İrəvanın bütün ümidlərini alt-üst etdi. Müharibə başlayar-başlamaz Paşinyan yardım üçün Putinə müraciət etsə də, tərəf-müqabilindən sadəcə diplomatik dəstək vədi ala bildi. Bu isə Ermənistanda rus xəyanəti kimi qarşılandı.
 
Sual oluna bilər: Ermənilərin məntiqi ilə desək, Rusiya niyə Ermənistana “xəyanət” etdi?
 
Türkiyənin   istefada olan aviasiya general-leytenantı Ərdoğan Qaraquşun bu suala cavabı konkret olub.
 
CNN Türk-ün suallarını cavablandıran Qaraquş deyib ki, Rusiya belə bir təşəbbüsə əl atsa Türkiyənin ciddi cavabı ilə qarşılaşa bilər: “Odur ki, Rusiya özünü zorla saxlayır. Hazırda Ermənistan Hərbi Hava Qüvvələri yoxdur. 20-30 il bundan əvvəl onlar Rusiya qırıcılarından istifadə edirdilər. Hanı indi o qırıcılar? Rusiya bilir ki, əgər bu qırıcılardan istifadə olunarsa, Türkiyə də bu işə qarışacaq. Ona görə də ehtiyatlı davaranır".