Türkiyə Xarici İşlər naziri Mövlud Çavuşoğlunun Azərbaycana gözlənilməz səfəri təsadüfə oxşamır. Səfərin məqsədinin Dağlıq Qarabağ məsələsinin müzakirəsi olduğu vurğulanır. Mövlud  Çavuşoğlunun xüsusi nümayəndə heyəti ilə ölkəmizə təşrif buyurması Dağlıq Qarabağ məsələsi ilə bağlı çox önəmli qərarların verilməsinə işarədir.
 
Ovqat.com xəbər verir ki, 2 gün öncə İravandan xüsusi gizli təyyarənin Ankaraya uçduğu barədə məlumatlar gündəmə gəlmişdi.
 
Rus media qurumlarının iddialarına görə, vətəndaşlığı bəlli olmayan Socata TBM-930 tipli  xüsusi təyyarə Ermənistanın paytaxtı İrəvandan Türkiyəyə doğru havalanmışdı. Gəmidə kimlərin olduğu barədə heç nə məlum deyildi.
 
Təyyarənin hərəkəti Flightradar portalının məlumatları ilə də təsdiqlənirdi. Maraqlıdır ki, nə təyyarənin port nömrəsi, nə də dəqiq təyinatı məlum idi.
 
İddia edilirdi ki, təyyarə bu uçuşu Ermənistan və Türkiyənin aviasiya qurumlarının xüsusi icazəsiilə həyata keçirmişdi.
 

 
Eyni anda, Almaniyanın Nürnberq şəhərindən xüsusi bir təyyarənin İrəvana gəldiyi bildirilirdi. Təyyarədə Qarabağdakı vəziyyəti müzakirə etmək üçün Almaniya hökumətinin bir qrup vasitəçisi olduğu ehtimal edilirdi.
 
Üzərindən iki gün keçdikdən sonra Türkiyənin Xarici İşlər nazirinin xüsusi nümayəndə ilə Bakıya gəlməsi və Dağlıq Qarabağ məsələsini Prezident İlham Əliyevlə birbaşa müzakirə etməsi bir çox ehtimallara yol açır. Belə görünür ki, Almaniyanın vasitəçiliyi ilə Ermənistanın Dağlıq Qarabağla bağlı Paşinyanın təbirilə desək “ağrılı güzəştləri Türkiyəyə çatdırılıb və Ankaradan rəsmi Bakının mövqeyini öyrənmək xahiş olunub. 
 
Diplomatik trafikin gizli tutulması da başadüşüləndir. İrəvan erməni xalqından gizli tutmağa üstünlük verdiyi ağır şərtlər altında sülhə razılaşmışa oxşayır.