“İnformasiya, Təhlil və Planlaşdırma” İctimai Birliyi Azərbaycan Respublikası Prezidentinin yanında QHT-lərə Dövlət Dəstəyi Şurasının maliyyə yardımı ilə  “Sosial şəbəkələrdə və digər internet informasiya resurslarında milli maraqların müdafiəsinin təşkili”  layihəsinin icrasını  həyata keçirir.

Layihənin məqsədi  internet informasiya resurslarında və sosial şəbəkələrdə milli maraqların müdafiəsi məqsədilə jurnalistlər, populyar Feysbuk sosial şəbəkəsi səhifələri və qruplarının adminləri və fəal istifadəçilərinin, sosial şəbəkə istifadəçilərinin maarifləndirilməsi və məlumatlığının artırılmasıdır.

Layihə rəhbəri Xaqani Səfəroğlu layihə haqqında məlumat verərək qeyd edib ki, müasir dövrdə informasiya müharibəsi aparan qlobal səviyyəli mərkəzlərlə yanaşı, konkret coğrafi məkanlarla lokallaşdırılmış “psevdolokal” mərkəzlər mövcuddur. Onlar öz qeyri-qanuni fəaliyyətlərini konkret bir dövlətə yönəltməklə məqsədlərinə nail olmağa çalışırlar: “Bu  layihə internet informasiya resurslarında və sosial şəbəkələrdə Azərbaycana qarşı aparılan informasiya müharibəsi, bu cür  səylərə qarşı maarifləndirmə tədbirlərinin həyata keçirilməsini nəzərdə tutur”.

Layihə çərçivəsində Bakı şəhərində KİV-də çalışan jurnalistlər, daha çox gənclər, populyar Feysbuk sosial şəbəkəsi səhifələri və qruplarının adminləri və fəal istifadəçiləri üçün 2 dəfə 1 günlük təlim keçiriləcək.  Həmçinin jurnalistlər və sosial şəbəkə istifadəçiləri üçün “Feyk xəbərlər və trollar vasitəsilə yayılan informasiyaların təsbit edilməsi üçün Bələdçi”hazırlanacaq.

Layihə çərçivəsində “Azərbaycana qarşı informasiya müharibəsi və mümkün müdafiə tədbirləri”  mövzusunda dəyirmi masa müzakirələri keçiriləcək.  Dəyirmi masaya Azərbaycan Mətbuat Şurası, KİVDF, aparıcı qəzet, xəbər portalları və saytları, populyar Feysbuk sosial şəbəkəsi səhifələri və qruplarının adminləri və fəal istifadəçiləri dəvət olunacaq. Müzakirələr nəticəsində hazırlanmış tövsiyyələr müvafiq dövlət qurumlarına təqdim  olunacaq.