"Bu gün Ümumdünya Psixi Sağlamlıq Gününə həsr olunmuş konfransda "Beynəlxalq Uşaq Qaynar Xətt Xidməti"nin təqdimat mərasimi də keçiriləcək".

''Report'' xəbər verir ki, bunu “Azərbaycan Uşaq Qaynar Xətt Xidməti”nin direktoru Kəmalə Aşumova jurnalistlərə açıqlamasında deyib.

Onun sözlərinə görə, Avropa telekommunikasiya şəbəkəsinin yeganə uşaq qaynar xətti olan (116-111) ötən həftə Azərbaycanda fəaliyyətə başlayıb: ''Telefon xidməti aktivdir. Dövlət qurumlarına da yönəldilib, regionlarda da yoxlamalar aparılıb. Hər il qaynar xəttə daxil olan zənglərin sayı 2500-3500 arasında dəyişir. Bu il oktyabr ayına qədər olan statistik məlumata əsasən, 3460 zəng daxil olub, zənglərin sayında artım var. Çünki texniki şərait dəyişir, texnologiyalar yenilənir, maarifləndirilmə işləri də aparıldığı üçün məlumatlılıq artır və zənglər çoxalır". 

K.Aşumova bildirib ki, müraciətlər, əsasən, sosial təhlükəli vəziyyətlər, şəraitsizlik uşaqların psixoloji zorakılığa məruz qalması, etinasızlıq halları və s. ilə bağlı olub: "Hazırda "Azərbaycan Uşaq Qaynar Xətt Xidməti" 4 uşaqla iş aparır. Onlar özünə inamsızlıq, yaşamamaq hissi ilə bağlı müraciət etmişdi. Təşkilat olaraq uşaq problemləri ilə də məşğul olduğumuz üçün 2019-cu ildə aldığımız rəsmi məlumatlara görə, Azərbaycanda 7 yetkinlik yaşına çatmayan uşaq öz həyatına suiqəsd edib. Ümumilikdə, zənglər müxtəlif şəxslər tərəfindən olur. Məsələn, müəllimlər, məktəb rəhbərləri, valideynlər və uşaqların özləri tərəfindən. Bizə müraciət edən uşaqlar bildirirlər ki, atam anamla görüşməyə qoymur və ya əksinə. Bunlar hamısı uşağın emosional vəziyyətinə təsir edirsə, biz deyə bilərik ki, bu, psixoloji zorakılıqdır. Elə olur ki, uşağı təsir altına salırlar, valideynə nifrət hissi oyadırlar. Bunlar bizdə psixoloji zorakılıq faktı kimi qeydə alınır. Təbii ki, bunlar araşdırılır, təşkilat olaraq onları dövlət qurumlarına yönəldirik".