İnsanlar onlara diskomfort yaradan problemi daha tez həll edirlər.

“Report” “Fast Company”yə istinadən xəbər verir ki, bu qənaətə Kanadanın Britaniya Kolumbiyası Universitetinin alimləri gəliblər.
Aparılan araşdırmanın nəticələrinə görə, problemin yaratdığı qorxu elə stresə gətirib çıxara bilər ki, insan onun qarşısında ərincək olmayacaq və hər şeyi bacardıqca cəld etməyə çalışacaq.

Alimlərin fikrincə, hər şey insanın durumu necə qavramasından asılıdır. Məsələn, gələcəkdə alacağı pensiyanın fikrini çəkən insanlar bu məsələni dərd etməyənlərdən 43% daha aktiv pul yığmağa başlayırlar.

Eyni şeyi ayrılıq haqqında da söyləmək olar. Belə ki, insan bunu stress durumu kimi dəyərləndirirsə, ağrılı söhbətə daha tez keçəcək.

Məqalədə vurğulanıb ki, əgər məsələ xoşagəlməz, ancaq dözümlüdürsə, insanlar bunu aylar və illər sonraya saxlaya bilər. Araşdırmaçılar belə durumdan çıxış yolunu təklif ediblər: fəaliyyətsizliyinizin ən mənfi fəsadlarını təsəvvür edin.

Qısası, özünüzü qorxudun – o zaman işləriniz daha sürətlə gedəcək.