Azərbaycanda keçirilən Zəfər Günü münasibətilə Türkiyənin Milli Müdafiə naziri Hulusi Akarın rəhbərlik etdiyi hərbi heyət ölkəmizə səfər edib.
 
Ovqat.com-un məlumatına görə, Türk generallarını Şuşada qəbul edən Prezident İlham Əliyev onlarla Qarabağ ətrafında baş verən son hadisələri müzakirə ediblər.
 
Görüşdə Azərbaycan Müdafiə naziri general-polkovnik Zakir Həsənov, Daxili İşlər naziri Vilayət Eyvazov, DTX-nin rəisi general-polkovnik Əli Nağıyev və digər hərbi yetkililər də iştirak ediblər. Məlumata görə, Türk heyəti Azərbaycan rəsmilərinə Prezident R.T.Ərdoğanın təbrik mesajını çatdırıblar.
 
Qeyd edək ki, Rusiya rəsmiləri bu həftə Moskvada Azərbaycan və Ermənistan liderlərinin yenidən görüşəcəkləri məlumatını yaymışdılar. Təxminlərə görə, görüşdə olduqca mühüm sənədlər imzalanacaq. Türk hərbi rəhbərliyinin məhz belə bir zamanda Azərbaycana səfər etməsi yalnız təbrik mesajl gətirmədikləri, gözlənilən Moskva görüşdə rəsmi Bakının mövqeyinin nə olacağı ilə maraqlanmaq məqsədi də daşıya bilər. Bu mülahizəyə inansaq, Azərbaycanın mövqeyi Ankara ilə razılaşdırılaraq Moskvada masaya yatırılacaq.


 
Maraqlıdır ki, Akarın rəhbərlik etdiyi Türk generaliteti Şuşada Azərbaycan rəsmiləri ilə görüşdüyü sıralarda Türkiyə silahlı dronları Ermənistanla sərhəddə kəşfiyyat uçuşları keçirirdi.