ABŞ prezidenti Co Baydenin administrasiyası ötən ilin sonunda Ukraynaya 200 milyon dollar məbləğində əlavə hərbi yardım göstərib. Bu fakt gizli tutulub. 
 
Ovqat.com xəbər verir ki, bu barədə CNN jurnalisti Kayli Atvud Yanvarın 10-da paylaşdığı twitində məlumat verib.
 
Jirnalist məlumatı Ağ evə istinadən yayıb. "Bayden administrasiyası dekabrın sonunda gizli şəkildə Ukraynaya əlavə 200 milyon dollarlıq hərbi yardım göndərdiyini təsdiqlədi", - o, Twitter səhifəsində yazıb.
 
CNN saytında dərc olunan məqalədə o və həmkarları dörd mənbədən bu faktı təsdiqləyən məlumat aldıqlarını iddia ediblər.


 
Nəşr qeyd edir ki, yeni dəstək paketi Vaşinqtona ötən il olduğu kimi eyni avadanlığın böyük hissəsini Kiyevə ötürməyə imkan verir: “Söhbət döyüş alətləri olaraq atıcı silahlar və döyüş sursatları, o cümlədən rabitə, tibbi avadanlıq, ehtiyat hissələri və s.-dən gedir”.
 
CNN-nin Ağ evə istinadən yaydığı məlumata görə, dekabrın ortalarına kimi ABŞ Ukraynaya 450 milyon dollardan artıq təhlükəsizlik yardımı göstərib. Adı açıqlanmayan Ağ ev rəsmisi bildirib ki, ilin sonuna qədər administrasiya Ukraynaya yeni Javelin raketləri və komanda buraxılış qurğuları, “Island” tipli patrul katerləri, ilk tibbi yardım dəstləri, bərkidilmiş radiolar, elektronika, tibbi avadanlıqlar, mühərriklər, generatorlar, ehtiyat hissələri və digər avadanlıqlar göndərib.