Tanınmış marketoloq, PR menecer Nigar Arpadarai parlament seçkilərində namizəd kimi iştirakla bağlı qərar verib.

Bu barədə N.Arpadarainin özü məlumat verib.

O, qeyd edib ki, ətraflı düşünəndən sonra, ailəsi, yaxınları ilə müzakirə və məsləhətləşmədən sonra 9 Fevral tarixində keçiriləcək Milli Məclisə seçkilər prosesinə namizəd qismində qatılmağa qərar verib: "Səmimi qəlbdən inanıram ki, ölkəmiz və xalqımız bu gün tarixində son dərəcə vacib bir mərhələdən keçir. Dövlət idarəçiliyinə gənclərin cəlb olunması, modernizasiya, inkişaf kimi anlayışlar, adi söz olmayıb, gələcəyin təminatıdır. Bizim və övladlarımızın gələcəyinin təminatı! Ailəsinin və övladlarının gələcəyini, doğma vətənimiz Azərbaycan ilə bağlayan bir insan üçün, bu proseslərdən, xüsusilə də yeni nəsil Parlamentinin, qanunverici və təmsilçi orqanın, formalaşması prosesindən kənarda qalmaq doğru deyil. Bu gün sənədlərimi doğulduğum, yaşadığım və işlədiyim gözəl və sevimli şəhərimizin mərkəzi rayonu olan 29 saylı Səbail Seçki Dairəsinə bitərəf namizəd kimi, qeydiyyat üçün təqdim etdim. Bütün həmvətənlərimi seçki prosesində fəal iştirak etməyə və bununla da Prezidentimizin inkişaf və islahatlara yönəlmiş səylərini dəstəkləməyə çağırıram".

Qeyd edək ki, əslən Cənubi Azərbaycandan olan Nigar Arpadarai 2009 ildən Azerfon şirkətində - Marketinq Ünsiyyət vasitələri, Brendin Strateji Mövqeləndirilməsi üzrə Menecer vəzifələrində çalışıb. 2012-ci ildən etibarən Azerfon şirkətinin Korporativ Ünsiyyət bölümünə rəhbərlik edib.

2006-2009 illər ərzində xanım Arpadarai öncə Avropa Komissiyasının Azərbaycandakı Xüsusi Elçisinin Ofisinin əlaqələndirici şəxsi, sonradan isə Avropa Komissiyasının Azərbaycandakı Nümayəndəliyinin mətbuat katibi vəzifələrində fəaliyyət göstərib. Nigar xanımın iş təcrübəsinə o cümlədən, Yunanıstan Respublikasının Azərbaycandakı səfirliyində və Azərbaycanda İxracın və İnvestisiyaların Təşviqi Fondunda iş daxildir.

O, son illər Bakı Şəhər Halqasının Marketinq və Kommunikasiya şöbəsinin rəhbəri vəzifəsində çalışıb.

Ailəlidir, bir oğlu var. \\Teleqraf.com