Xəbər verdiyimiz kimi, bu gün Rəşad Eynəddin oğlu Məmmədov Azərbaycanın Türkiyədə fövqəladə və səlahiyyətli səfiri təyin edilib. Prezident İlham Əliyev bununla bağlı sərəncam imzalayıb.
 
Türkiyədəki yeni səfirimiz kimdir?
 
Modern.az-ın məlumatına görə, Rəşad Eynəddin oğlu Məmmədov 31 oktyabr 1973 ildə Gəncə şəhərində anadan olub. 1990–1995 –ci illərdə Bakı Dövlət Universitetinin Hüquq fakültəsində təhsil alıb.2002–2004- cü illərdə G. Plexanov adına Rusiya Dövlət İqtisad Akademiyasının magistraturasını, 2017–2020-ci illərdə isə Əl-Fərabi adına Qazaxıstan Milli Universitetinin doktoranturasını bitirib.
 
R.Məmmədov əmək fəaliyyətinə Ədliyyə Nazirliyində başlayıb. 1990-1992-ci illərdə Ədliyyə Nazirliyinin Aparatında Kargüzar olaraq çalışıb. 1992-1994-ci illərdə həqiqi hərbi xidmətdə olub.
 
Səfir həm də Birinci Qarabağ müharibəsi veteranıdır. Belə ki, o, Goranboy ikinci ərazi botalyonunda və Müdafiə Nazirliyinin Murov istiqamətində döyüş şəraitində olan N saylı hərbi hissəsində döyüş yolu keçib. 1995-1996-cı illərdə Bakı Hərbi Prokurorluğunda Mühafizə bölməsinin rəisi olub.
 
Bundan əlavə, R.Məmmədov 1996-2000-ci illərdə Bakı Hərbi Prokurorunun köməkçisi, 2000-2001-ci illərdə Azərbaycan Respublikası Xarici İşlər Nazirliyi MDB idarəsində attaşe, 2001-2006 -cı illərdə Azərbaycan Respublikasının Rusiya Federasiyasındakı Səfirliyində üçüncü katib, ikinci katib işləyib. 2006-2008-cı illərdə Xarici İşlər Nazirliyinin Konsulluq idarəsində Konsuluq Hüquq məsələləri şöbəsinin müdiri, 2008-2010-cı illərdə Azərbaycan Respublikasının Qazaxıstan Respublikasının Aktau şəhərindəki Baş Konsulluğunda Baş Konsulun vəzifəsini icra edib. 2010-cu ildə Prezidentin Sərəncamı ilə R.Məmmədova Birinci dərəcəli Fövqəladəvə Səlahiyyətli Elçi diplomatik rütbəsi verilib. 2010-2015-ci illərdə Azərbaycan Respublikasının Qazaxıstan Respublikasının Aktau Şəhərindəki Baş Konsulu olub.
 
2015-2021-ci illərdə isə Azərbaycanın Qazaxıstanda fövqəladə və səlahiyyətli səfiri vəzifəsində çalışıb.
 
 İngilis və rus dillərini bilir. Evlidir, üç övladı var.