İran üçün yeni dönəm: “Millətlər mütəşəkkil mübarizə ilə öz milli haqlarına sahib olurlar”-Millət vəkili

Avqustun 5-də and içən İranın yeni prezidenti İbrahim Rəisi vəzifəsinin icrasına başlayıb.

İran hökuməti 44 günlük Vətən müharibəsi zamanı Azərbaycan xalqını narazı salan davranış sərgilədi. Türkiyə, Pakistan, Ukrayna, İsrail, Gürcüstan kimi dövlətlər işğal olunmuş torpaqlarını azad edən Azərbaycanın haqq işinə açıq dəstək versələr də Tehran birmənalı mövqe qoymadı.

Əksinə ənənəvi ermənipərəst siyasət aparıldı. Yeni prezidentin İranın Qafqaz siyasətini dəyişəcəyinə dair gözləntilər var. İbrahim Rəisinin buna gücü çatacaqmı?

O, Tehranın sözdə islam, əməldə erməni təəssübkeşliyi siyasətinə korrektə edəcəkmi? İranda yaşayan digər millətlərin milli hüquqlarının təmin olunması istiqamətində hansı müsbət dəyişikliklər ola bilər?

Milli Məclisin üzvü, Bütöv Azərbaycan Xalq Cəbhəsi Partiyasının sədri Qüdrət Həsənquliyev Günaz.TV-yə açıqlamasında deyib ki, İbrahim Rəisinin İranın xarici siyasətində qlobal dəyişiklik edəcəyini gözləmir:

“İranda dövlət siyasətini əsasən Ali Dini lider müəyyənləşdirir. Ona görə də prezidentlərin dəyişməsi heç nəyi dəyişmir və həll etmir.

Prezidentlər dövlət siyasətinin müəyyənləşməsində həlledici rola malik deyillər”. Millət vəkili hesab edir ki, yeni prezident daxili siyasətdə də ciddi korrektələr edə, özəlliklə milli məsələdə köklü dəyişikliyə nail ola bilməz:

“Prezidentin Ali Rəhbərin razılığı olmadan ciddi islahatlar həyata keçirməsi mümkünsüzdür. Milli haqlara millətlər mübarizə yolu ilə nail olurlar.
Ya da millətlər ölkə daxilində demokratiyanın inkişafına töhfə verməklə milli haqlara sahib olurlar. Görünən odur ki, Qərb İranın parçalanacağına yol açacağından qorxduğu üçün demokratik prosesləri dəstəkləmir.

İran cəmiyyətini təşkil edən xalqlar kənardan kömək gözləmədən, qansız-qadasız milli haqlarına qovuşmaları üçün ölkədəki demokratik prosesləri dəstəkləməlidir.

Onların əsas vəzifəsi siyasi həyatda yaxından iştirak etmək, milli haqları müdafiə edəcək namizədləri seçkilərdə aktiv dəstəkləmək olmalıdır. İrandakı milli haqqlar və ana dili uğrunda mübarizə aparan milli fəallar yerli şərait və reallıqlar nəzərə alınmaqla özləri üçün fəaliyyət proqramı qəbul etməlidirlər.

Millətlərə azadlığı kimsə vermir, onlar siyasi baxımdan yetkin və mütəşəkkil olanda öz milli haqlarına sahib olurlar. Bu yolda ən böyük nailiyyət milli özünüdərk, milli kimliyinə hörmət, milli mədəniyyətin və dilin inkişafıdir.

Qalan məsələlər zamana bağlıdır. İranda yaşayan Azərbaycan türkləri hazırda milli təhsil və türk dilinin İranda ikinci dövlət dili olması məsələsini siyasi gündəmə daşımalıdırlar”.

Gunaz.tv