“Türkiyə Krımın Rusiya tərəfindən qanunsuz işğalını tanımadı, tanımayacaq və Ukraynanın ərazi bütövlüyünü dəstəkləyəcək”.
 
Ovqat.com xəbər verir ki, Türkiyənin Xarici İşlər naziri Mövlud Çavuşoğlu Kiyevdə keçirilən “Krım platforması”nda çıxış edərkən belə deyib.
 
Krımın qeyri -qanuni ilhaqından yeddi ildən çox vaxt keçdiyini xatırladan Çavuşoğlu bütün dünyanı Ukraynanın haqq işini dəstəkləməyə çağırıb: “Ukraynanın bütövlüyünə dəstəyimiz kifayət qədər güclüdür. Dünya birliyi bu beynəlxalq hüququn pozulmasına yekdilliklə qarşı çıxmalıdır”.
 
Qeyd edək ki, “Krım platforması” forumu bu gün Kiyevdə təsis toplantısını keçirib. Toplantıda 44 ölkə və beynəlxalq təşkilatdan ən yüksək səlahiyyətli rəsmilər qatılıblar. Forumun məqsədi beynəlxalq ictimai rəy yaradaraq Moskvaya təzyiq göstərmək və onu 7 il əvvəl işğal etdiyi yarımadadan çıxarmaqdır.