“AZOVSTAL” DÖYÜŞÇÜLƏRİNİN TALEYİ NECƏ OLACAQ? – Rusiyadan ziddiyyətli açıqlamalar

Rusiya rəsmiləri mübadilə çərçivəsində Ukraynaya qayıtmağı gözləyən “Azovstal”da əsir götürülən hərbçilərin taleyi ilə bağlı ziddiyyətli açıqlamalar verirlər.

“AzPolitika.info” xəbər verir ki, bu barədə Ukraynanın “UNİAN” Agentliyi məlumat yayıb.

Məlumatda qeyd olunur ki, mayın 22-də “dnr”-in rəhbəri Denis Puşilin Rusiya mətbuatına açıqlamasında bildirib ki, ukraynalı hərbçilər üçün Donetsk vilayətinin müvəqqəti işğal olunmuş ərazilərində “beynəlxalq tribunal” təşkil ediləcək. “dnr” liderinin psevdoməhkəmə prosesinə hansı ölkələri cəlb etməyi planlaşdırdığı barədə məlumat verilməyib. Ancaq Rusiya KİV-ləri Puşilinə istinadən bildirir ki, onlar bu proses üçün fəal şəkildə sənədlər hazırlayırlar.

Rusiya Xarici İşlər Nazirliyi isə “Azovstal”ın müdafiəçilərinin mübadiləsinin mümkünlüyündən danışır.

Belə ki, Xarici İşlər nazirinin müavini Andrey Rudenko ukraynalı hərbçilərin əsir götürülmüş Rusiya hərbçiləri ilə dəyişdirilməsi imkanının müzakirə edilib-edilməməsi ilə bağlı sualı cavablandırarkən deyib: "Bu, mənim səlahiyyətimdə deyil. Yəqin ki, bütün bunlar müzakirə olunur".

Kremldən “Azovstal” müdafiəçilərinin mübadiləsinə icazə verib-verməməyəcəyi ilə bağlı suala isə o, belə cavab verib: “Mən sağlam düşüncəyə zidd olmayan istənilən ehtimalı mümkün sayıram”.

“UNİAN”-ın məlumatına görə, zavodun ərazisində olan bütün insanlar “Azovstal”dan təxliyə edilib. Ağır yaralananlar Rusiyanın nəzarətində olan Novoazovskdakı tibb müəssisəsinə yerləşdirilib. Mariupolun müdafiəçilərinin bir qismi isə humanitar dəhliz vasitəsilə Rusiyanın nəzarətində olan Olenevka kəndinə aparılıb.

Prezident Volodimir Zelenski mətbuata açıqlamasında bildirib ki, ukraynalı döyüşçülərin beynəlxalq təşkilatların vasitəçiliyi ilə vətənə qaytarılması planlaşdırılır: “Hər şey BMT, Qırmızı Xaç və Rusiya Federasiyasının üzərinə götürdüyü işdən asılıdır. Biz bu və ya digər mübadilə formatını gözləyirik. Biz onları evə qaytaracağıq”.

Qeyd edək ki, mayın 19-da Beynəlxalq Qızıl Xaç Komitəsinin nümayəndələri Donetsk vilayətinin işğal olunmuş Olenovka kəndinə aparılan ukraynalı döyüşçülərə baş çəkiblər. BQXK vurğulayıb ki, təşkilatın prioritet vəzifələri hərbi əsirlərin saxlanma şəraiti və onlarla rəftarın yoxlanılması, həmçinin onların itkin düşməsinin qarşısının alınması, ailələri ilə əlaqə saxlamaqdır

Təşkilat hərbi əsirlərin qeydiyyatını aparır. Lakin siyahıların məxfi qalacağı və ictimaiyyətə açıqlanmayacağı barədə xəbərdarlıq edib.

Ukrayna müdafiə nazirinin müavini Anna Malyar bildirib ki, Rusiya rəsmilərinin “Azovstal”ın ukraynalı müdafiəçilərinin rus əsirlərlə mübadiləsinini mümkünlüyünə dair fikirləri, ölkə daxilinə hesablanmış təbliğatın bir parçasıdır.

Ana səhifəyə qayıt Baxış: 3 208 Tarix: 23-05-2022, 18:23

Xəbəri paylaş

Paylaş: