Qeyd edək ki, hazırda Rusiyanın Ermənistandakı səfiri vəzifəsini Sergey Kopırkin icra edir. Bu şəxsin Ermənistandakı fəaliyyəti Rusiya Xarici İşlər Nazirliyinin də narazılığına səbəb olub. Belə ki, "Past” qəzetinin verdiyi məlumata görə, noyabrın 2-də Kopırkin Moskvaya çağırılıb və onunla kifayət qədər ciddi söhbət aparılıb. Səfir Ermənistanda Rusiyanın yürütdüyü real siyasi xətti həyata keçirə bilməmək və konkret tapşırıqların yerinə yetirilməməsində ittiham olunub. 

Ona edilən bu xəbərdarlıq Azərbaycan Ermənistan münaqişəsinin həllinə münasibətdə səsləndirdiyi fikirlər rəsmi Kremlin mövqeyindən kifayət qədər fərqlənməsilə bağlı olub. Bu açıqlamadan da göründüyü kimi, Rusiyanın Ermənistandakı səfirinin fəaliyyətindən Kreml özü də narazıdır. İndi isə Kopırkin Rusiyalı turistləri Ermənistanın Azərbaycanla sərhəd rayonlarına getməməyə çağırıb. 

Politoloq Zərdüşt Əlizadə Qaynarinfo-ya açıqlamasında bildirib ki, Kopırkinin bu sayaq açıqlaması Azərbaycanla Ermənistan arasında Qərbin dəstəyilə imzalanması gözlənilən sülh müqaviləsinin bağlanmasına əngəl olmaq məqsədi daşıyır:

"Rusiyanın İrəvandakı səfirinin belə bir açıqlama verməsi əslində informasiya müharibəsinin tərkib hissəsidir. Bu xəbərdarlıqda səfir demək istəyir ki, Rusiya guya, Azərbaycandan Ermənistan ərazisinə hücumlar olacağını gözləyir. Rusiya Ukraynaya hücumdan əvvəl də vətəndaşlarına bu ölkəni tərk etməyi məsləhət görmüşdü. Bununla Rusiya Ermənistandakı səfirinin dililə dünyaya mesaj ünvanlayır ki, guya, Azərbaycan hücuma hazırlaşır. Görünən odur ki, səfirin həmin açıqlaması sülh prosesinin tənzimlənməsinə mane olmağa hesablanıb”.