Tripolidə Liviyanın Milli Razılıq Hökumətinə (MRH) tabe olan silahlı dəstələr cümə günü axşam ölkənin cənubunda yerləşən və devrilmiş və qətlə yetirilmiş lider Müəmmar Qəddafiyə sadiq keçmiş məmurların saxlandığı həbsxananı ələ keçiriblər.

"Report" xəbər verir ki, bu barədə "France Press" məlumat yayıb.

İslah müəssisəsində Liviyanın sabiq baş naziri Bağdadi əl-Mahmudi (2006-2011) və Liviya xüsusi xidmət orqanlarının sabiq rəisi Abdulla əs-Senussi də daxil olmaqla 30 keçmiş dövlət xadimi cəza çəkir.

Məlumata görə, həbsxana ələ keçirilənədək başqa bir qruplaşmanın nəzarəti altında olub. Hücum zamanı türmənin iki mühafizəçisi ölüb. Məhbusların aqibəti barədə məlumat yoxdur.