Bu il Tovuzda 50 hektar sahədə tütün becəriləcək. Artıq bitkinin əkininə start verilib.

Ovqat.com AZƏRTAC-a istinadən xəbər verir ki, tütün əkini əsasən dağlıq və dağətəyi kəndlərdə həyata keçiriləcək. Ötən il 20 hektar ərazidə tütün becərən sahibkarlar şitilləri Zaqatala-Balakən zonasından gətiriblər. Bu il isə tütün şitilləri rayondakı istixanalarda yetişdirilib.

Ölkədə qeyri-neft sektorunun inkişaf etdirilməsi ilə bağlı həyata keçirilən tədbirlər çərçivəsində tütünçülüyün rayonda inkişafı qarşıya məqsəd qoyulub. Bitki düzgün aqrotexniki qulluq edilərsə, hektara yaşıl kütlə halında 25, quru halda isə 2 ton məhsul verir.

Qeyd edək ki, mayın sonunda ilk məhsul yığımı həyata keçiriləcək.