"Azərbaycana məxsus təbii qazı Bolqarıstana ötürəcək Yunanıstan-Bolqarıstan İnterkonnektorunun (Interconnector Greece – Bulgaria: IGB) inşası Avropa İttifaqının ən prioritet 7 layihəsindən biridir, bütün region üçün vacibdir".

“Report” xarici mətbuata istinadən xəbər verir ki, bunu Bolqarıstanın energetika naziri Temenujka Petkova bildirib.
“IGB bizi Cənub Qaz Dəhlizi ilə birləşdirəcək, təbii qaz mənbələrinin və tədarük marşrutlarının real şaxələndirilməsini təmin edəcək”, - deyə o, qeyd edib.

T.Petkovanın sözlərinə görə, şaxələndirmə Bolqarıstan üçün əsas prioritetdir: “Çünki, bu, rəqabətqabiliyyətli qiymətlər və rəqabətə davamlı iqtisadiyyat deməkdir".

IGB Xəzər dənizinin Azərbaycan sektorundakı "Şahdəniz" qaz kondensat yatağının II mərhələdə istismarı çərçivəsində hasil edilən "mavi yanacağ"ın Bolqarıstana nəqlini nəzərdə tutur. Trans-Adriatik Boru Kəmərinə (TAP) qoşulacaq bu kəmər vasitəsilə Bolqarıstan Azərbaycandan ildə 1 milyard kubmetr təbii qaz idxal edəcək. Belə ki, “Bulgargaz EAD” dövlət şirkəti “Şahdəniz-2” yatağından bu miqdarda qaz almaq üçün "Şahdəniz" konsorsiumu ilə müqavilə imzalayıb. Azərbaycan təbii qazı hesabına Bolqarıstan qaz tələbatının 25-30 %-ni dəyə biləcək. IGB-də tikinti işlərinin gələn ilin ikinci yarısında başa çatacağı gözlənilir.

Ümumi uzunluğu 182 kilometr olan boru kəmərinin 150 kilometri Bolqarıstan ərazisindən keçəcək. Kəmərin illik ötürücülük gücü 3-5 milyard kubmetr həcmində nəzərdə tutulur.