Şimali İraqda keçirilən referendumdan sonra rəsmi Bağdad problemin hərbi yolla həlli arayışlarını artırıb.

Ovqat.com xəbər verir ki, bir neçə gün öncə Ankaraya səfər edən İraqın Baş qərargah rəisi Osman Qənimi dünən yüksək rütbəli hərbi heyətlə Tehrana gedib.

Tehran səfərinin səbəbləri ilə bağlı İraq Müdafiə Nazirliyi tərəfindən yayılan yazılı rəsmi açıqlamada iki ölkə hərbçilərinin əməkdaşlıq və həmrəylik səylərini artırmaq üçün görüşlər keçirəcəyi bildirilsə də, müşahidəçilər əsas məqsədin referendumdan sonra yaranan geopolitik  vəziyyəti müzakirə etmək olduğunda həmfikirdirlər.

Hazırda İraqda 10 minlərlə İran əsgərinin Həşdi Şabi qüvvələri arasında döyüşdüyü xəbər verilir. Kürdüstan Demokratik Partiyasından İraq parlamentinə seçilən millət vəkili Şahəvan Abdullahın fikrincə, bu rəqəm hətta 30 mindən yuxarıdır. İranlı “könüllülərin” ayətullah Əli Sistaninin çağırışıyla İraqa gəldikləri təxmin olunur.