Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə “Qarabağ: Azərbaycan mədəniyyətinin beşiyi” adlı mədəniyyət tədbirlərinə start verilib.

Ovqat.com-a bu barədə məlumat Mədəniyyət Mərkəzindən daxil olub.

Məlumata görə, bununla əlaqədar Azərbaycan Mədəniyyət Mərkəzinin foyesində “Hər anımız Vətən! – desin!” adlı sərginın açılışı olub. Sərgidə Qarabağ diyarı, bu bölgənin tarixi, mədəniyyəti, abidələri, işğaldan əvvəl və sonrakı vəziyyətə dair fotoşəkillər nümayiş etdirilib, Qarabağa, habelə Ermənistan-Azərbaycan, Dağlıq Qarabağ münaqişəsinə dair Azərbaycan, özbək və rus dillərində kitablar, jurnallar və digər nəşrlər sərgilənib.

Qeyd edək ki, tədbirdə Daşkənddəki orta məktəblərin çoxsaylı müəllim və şagird heyəti, ali məktəblərin təmsilçiləri, jurnalistlər iştirak ediblər.

Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov ilk öncə Azərbaycan-Özbəkistan dostluğu, xalqlarımızın yaxınlığı, dövlətlərimiz arasındakı yüksək səviyyəli münasibətlər haqqında danışıb.

Diplomat  hər bir insan qəlbində torpaq və yurd sevgisinin ən böyük sevgi olduğunu söyləyərək, gələcək nəsillərə Vətənə məhəbbət və sədaqətin aşılanmasının vacib olduğunu bildirib.

Samir Abbasov Azərbaycan mədəniyyətinin beşiyi olan Qarabağ diyarı, onun tarixi, adət-ənənələri, bugünki vəziyyəti haqqında da məlumat verib. Min illərdir ulu əcdadlarımızın bu torpaqda yaşayıb, böyük tarix və mədəniyyət yaratdığını qeyd edən Samir Abbasov Qarabağın Azərbaycan mədəniyyətinə verdiyi töhvələrdən danışıb, böyük bir tarixin, mədəniyyətin saxtalaşdırılmasının, dağıdılmasının   yolverilməz olduğunu vurğulayıb. O, il ərzində Özbəkistanda Azərbaycan Mədəniyyət Mərkəzinin təşkilatçılığı ilə  “Qarabağ Azərbaycan mədəniyyətinin beşiyi” adlı layihə çərçivəsində çoxsaylı tədbirlərin reallaşdırılacağını bildirib.

Tədbirdə çıxış edən Özbəkistan-Azərbaycan Dostluq Cəmiyyətinin təmsilçisi, pedaqoq Şaxnoza Nurbekova, Qadın və uşaq Komitəsinin eksperti, pedaqoq Rano Kadırova iki qardaş ölkənin dostluğu, vətənə və torpağa məhəbbət, Azərbaycan xalqının Qarabağda yaratdığı böyük mədəniyyət, Azərbaycan mədəniyyətinin incisi - Şuşa, dahi Üzeyir Hacıbəyov, Xan Şuşinski, Bülbül kimi şəxsiyyətlərin bütün dünyada tanınıldıqlarını və sevildiklərini qeyd ediblər.

Natiqlər vətənə məhəbbətin bütün hisslərin ən ülvisi, ən müqəddəsi və ən gözəli olduğunu qeyd edərək, əsl vətəndaş üçün torpağın, ana yurdun müqəddəs olduğunu söyləyiblər.

Tədbirdə Azərbaycan Respublikasının Gənclər və İdman Nazirliyinin dəstəyi ilə “Virtual Qarabağ” İKT Mərkəzi tərəfindən hazırlanmış eyniadlı sayt təqdim edilib, uşaq və yeniyetmələr üçün dünyanın müxtəlif muzeylərində Azərbaycanın Qarabağ diyarına dair saxlanılan maraqlı tarixi  eksponatlarla, xalçalarla, geyimlərlə tanışlıq məqsədi ilə virtual tur keçirilib.

Azərbaycan Mədəniyyət Mərkəzinin nəzdindəki “Azərbaycan qızları” rəqs ansamblı Qarabağa dair rəqslər ifa edib və bu ifa tədbir iştirakçıları tərəfindən maraqla qarşılanıb.

Bununla da Özbəkistanda “Qarabağ Azərbaycan mədəniyyətinin beşiyi” adlı layihəyə start verilib.

Qeyd edək ki, layihə çərçivəsində “Azərbaycanın Qarabağ diyarı - Özbəkistan rəssamlarının gözü ilə” adlı rəsm müsabiqəsi və sərgisi, habelə “Könlüm keçir Qarabağdan” adlı şeir müsabiqəsinin keçirilməsini nəzərdə tutulub.

Mərkəz müsabiqə çərçivəsində hər iki ölkənin şairlərinin və həvəskar şeirsevərlərin Qarabağa həsr etdikləri ən maraqlı və gözəl şeirlərinin, poemalarının seçilməsi və onların nəşrini planlaşdırır.

Bundan başqa, sözügedən mövzuda tədqiqat əsərlərinə, yerli mətbuatda çoxsaylı məqalələrin dərc edilməsinə dəstək göstəriləcək, il ərzində özbək, rus və Azərbaycan dillərində kitabların, videoroliklərin, filmlərin subtitrla hazırlanması, habelə qardaş ölkədə Qarabağa həsr olunmuş konsertlərin, muğam gecələrinin təşkili nəzərdə tutulub.