“Postsovet məkanında komplementarizm dövrü arxada qaldı... İndi siz ya Rusiyanın yanındasınız, ya da Rusiyanın əleyhinə”.

 Ovqat.com-un məlumatına görə, bu barədə erməni politoloq Stepan Danielyan Facebook səhifəsində yazıb.

Politoloqun fikrincə, Ermənistanın beynəlxalq arenada uduzmasının əsas səbəbi daxilən parçalanmasıdır: “Ermənistan daxilən parçalandı, yalnız bundan sonra beynəlxalq arenada uduzduq”.

Postsovet məkanında “komplementarizm” dövrünün arxada qaldığını düşünən Danielyanın fikrincə, ABŞ və Rusiya arasında indiyə qədər dolaylı müharibə gedirdi:

“İndi isə siz ya Rusiyanın yanında, ya da onun qarşısında olmalısınız. Təbii ki, heç kim seçim etmək istəmir, amma məcburdur. Hazırda nə Qərb, nə də Rusiya Türkiyə-Azərbaycanla münaqişəyə girməz, çünki bundan hər ikisi böyük itkilərlə ayrılar. Türkiyə fürsətlər astanasında oynayır və Azərbaycan üçün bu, ən gözəl saatdır və bundan maksimum istifadə etməlidir”.

Ermənistanın bu mürəkkəb beynəlxalq münasibətlər sistemində zəif həlqə olduğunu düşünən politoloq düşünür ki, başqaları onun hesabına öz problemlərini həll edir: “Daxili parçalanma vəziyyətindəyik. Bununla belə, iradə və biliyin vəhdəti ilə istənilən məsələni həll etmək olar və bunun üçün bir-birinizi dinləməyi, başa düşməyi, daxili razılaşmanın tərəflərini tapmağı bacarmalısınız. Yalnız bundan sonra biz kənar problemlərdən danışa bilərik”.

Ovqat.com