Bryansk vilayətində dəmir yollarında növbəti partlayış baş verib. 

Partlayışın Moskva saatı ilə 10:52-də vilayətin Uneça-Jeça bölgəsində baş verdiyi bildirilir. Moskva Dəmir Yollarından bildiriblər ki, dəmir yolunun bu hissəsində zədələnmiş relslər aşkarlanıb. Partlayış zamanı burdan yolölçən qatar keçirmiş. İddiaya görə, qatara ziyan dəyməyib, tələfat olmayıb.

Moskva Dəmir Yollarının bildirdiyinə görə, yolun bu hissəsində şəhərətrafı və sərnişin qatarları keçmir. Bu fakt  sübut edir ki, hadisənin əsas məqsədi Rusiyaya hansısa zərər vurmaqdan çox, terror hadisəsi olub adıyla gurultu qoparmaqdır. Əks halda, “terror hadisəsi” heç bir sərnişin qatarının keçmədiyi yolda törədilməzdi.

Xatırladaq ki, bundan əvvəl, daha doğrusu, bu gecə Bryanski və Kursk ərazisindən keçən dəmir yolu xəttində daha iki partlayış olmuşdu. Partlayışlardan biri sərnişin qatarına qarşı törədilmiş və dəmir yolu üzərində bir körpü parladılaraq hərəkətdə olan qatarın üzərinə uçurulmuşdu. Nəticədə 7 nəfər həyatını itirmiş, onlarla insan yaralanmışdı. Yaralılar arasında uşaqlar da var.

Partlayışların zamanlaması da diqqətçəkicidir. Məlumdur ki, sabah İstanbulda Rusiya-Ukrayna rəsmilərinin növbəti görüşü olacaq. Keçmiş təcrübələr də göstərir ki, iki ölkə arasında keçiriləcək bu görüşlərdən əvvəl ya Rusiya Ukraynaya, ya da Ukrayna Rusiyaya qarşı ciddi səs-küy doğuran hücumlar edir və sülh gündəmi bir addım geri salınır. Zənnimizcə, bu gün törədilən təxribatların da əsas məqsədi budur – sülh gündəmini zəiflətmək, tərəflər arasındakı münasibətləri daha da korlamaq və danışıqların müsbət nəticəsini sıfırlamaq.

Məsələ burasındadır ki, Rusiya sırf beynəlxalq ictimaiyyətin sərt təpkisinə yol açmamaq, sülhü istəməyən tərəf kimi görünməmək xətrinə bu danışıqlara gedir. Putinin danışıqların Türkiyədə keçirilməsində israr etməsinin əsas səbəblərindən biri də budur. Maraqlıdır ki, bunu Rusiya yetkililəri də gizlətmirlər. Putin administrasiyasının ağıl xocası olaraq tanınan Aleksandr Duqin mediaya verdiyi açıqlamasında bildirib ki, Moskvanın görüş yeri kimi İstanbulu seçməsinin bir məqsədi var: Ukraynaya 2022-ci ildə bu şəhərdə keçirilən danışıqlar prosesini xatırlatmaq. Duqinin fikrincə, Moksva bu taktika ilə Ukrayna heyətinə “vaxtında razılaşmadığınız İstanbul razılaşmasının xiffətini çəkəcəksiniz” mesajını vermək istəyir. Onun məntiqindən belə çıxır ki, bu dəfəki danışıqların şərtləri daha ağır olacaq və hər dəfə rəsmi Kiyev Rusiyanın şərtlərini qəbul etmədikcə, onlar daha da ağırlaşacaq. Və uzlaşılmayan hər danışıqlardan sonra Ukrayna daha çox peşiman olacaq və nəhayət daha ağır kapitulyasiya təklifləri ilə razılaşmaq məcburiyyətində qalacaq. 

Rusiya tərəfinin bu istəklərindən fərqli olaraq, Ukraynanın daha ağır şərtlərlə razılaşması da mümkün deyil. Görünən budur ki, Rusiya bu uzlaşmaz mövqe sərgiləməklə həm də “özünü dəymədüşərliyə qoyan” ABŞ prezidenti Donald Trampı bezdirib vasitəçilik təşəbbüsündən tamamilə geri çəkilməsinə nail olmaq və Ukrayna ilə döyüş sahəsində təkbətək qalmaq niyyətindədir. Bunu bacaracaqmı? Bilmirəm. Hər şey Avropa dövlətlərinin Ukraynanın arxasında nə qədər dayanacağından asılıdır. Avropada isə Ukrayna-Rusiya savaşı artıq bezdirici hal alır və get-gedə sosial rifah halı pozulan qərblilər hakimiyyətlərini dəyişib yerlərinə rus qafalı hökumətləri gətirirlər. 

Görünür, Rusiya da məhz bu səbəbdən savaşı uzatmağın nəticə etibarilə öz xeyrinə olacağını düşündüyündən bu qanlı taktikaya daha çox üstünlük verir. Başqa sözlə desək, bir daşla iki quş vurur: savaşı uzatmaqla həm ABŞ-ı, həm də Avropa İttifaqını dövriyyədən çıxarmağa çalışır.