Özünü Muay-Tay Federasiyasının prezidenti kimi təqdim edən Araz Musayev xeyli ajiotaj yaradan iddialar irəli sürüb. Özünün Facebook səhifəsində Prezidentə video-müraciət ünvanlayan idmançı Kinq-Boks Federasiyasının fəxri prezidenti Adil Əliyevin onu öldürmək istədiyini və bu məqsədlə də dünya çempionatının getdiyi Türkiyənin Antalya şəhərinə 7 “killer” göndərdiyini bildirib. Onun sözlərinə görə, 7 “killer”in bıçaqlı hücumuna məruz qalan idmançı başından və qarnından yaralanaraq xəstəxanaya aparılıb və bir neçə gün orda müalicə aldıqdan sonra evə buraxılacaq 

Bəs, soyuq silahlarla silahlandıqlarıı halda 1 nəfərin öhdəsindən gələ bilməyən həmin “killer”lər kim olsa yaxşıdır? Araz Musayevin sözlərinə görə, bunlardan biri Kinq-Boks Federasiyasının vitse-prezidenti Elşən Abdurrəhimov, o biri isə Uşasanda Federasiyasının prezidenti Azər Həsənsoydur. Digər “killer”lər isə guya Rusiyadan tutulub və ölüm fitvasını yerinə yetirmək üçün Antalyaya göndərilib.

Doğrusu, Adil Əliyevin guya öz rəqibini ortadan qaldırmaq üçün Azərbaycanın ən sanballı idmançılarını bu işə cəlb etməsi bizə qeyri-adi gəldi. Nədən ki, belə kirli işlərə adətən Federasiya prezidentləri yox, adi küçə adamları, kriminal ünsürlər cəlb olunurlar. Üstəlik, ağıllı sifarişçilər özlərinin kimliyini gizlətmək üçün yaxın ətrafını bu kirli əməliyyatlara göndərməzlər. Xüsusilə də xaric ölkələrə. Məgər Türkiyədə “killer” qıtlığı yaşanır ki, Musayevi öldürmək üçün xüsusi reyslə 5 nəfər Moskvadan, 2 nəfər isə Bakıdan Antalyaya ezam olunurdu? Məhz bu suala cavab axtarmaq üçün Musayevin iddialarını araşdırmağa qərar verdik.

Söhbətləşdiyimiz idmançıların bildirdiyinə görə,  Musayevin adlarını çəkdiyi Kinq-Boks Federasiyasının üzvləri Antalyaya idman yarışlarına getmişdilər. Özü də dünya çempionatına. Onların qarşısına qoyulan yeganə tapşırıq isə Antalyadan Azərbaycana medal gətirmək idi, hansısa şəxsin başını yox. 

Musayevin digər maraqlı iddiası isə onun barəsində çıxarıldığını iddia edilən ölüm fitvasının motivi ilə əlaqədardır: İdmançının sözlərinə inansaq, Adil Əliyev “Azərbaycanın bayrağını ən yüksək idman tribunalarında göylərə qaldıran” bu şəxsi ona görə öldürməyə qərar vermişdi ki, guya onun Gənclər və İdman Nazirliyi tərəfindən belə tanınmayan federasiyasına göz dikmişdi. Həm də niyə? Çünki Suraxanı icra başçısı guya hər kəsin ona “Cənab Adil müəllim” deməsindən xoşlanırmış. Yəni vaxtilə deputatlıq mandatını daşıyan, indi isə icra başçısı vəzifəsi daşıyan bir şəxs sadəcə kimlərinsə dilindən  “cənab” sözünü eşitmək üçün bu qədər böyük fədakarlığa və riskə qatlanırmış. Dİ gəl ki, bu arzusunu 7 əli silahlı “killer”in köməyi ilə də bacarmayıb. İddianın nə qədər gülünc olduğunu söyləməyə belə ehtiyac hiss etmirik.

Fikirlərini soruşduğumuz idman ictimaiyyəti namayəndələrinin bildirdiyinə görə, Musayevin öz ittihamlarında xüsusilə Adil Əliyevin üzərində dayanması təsadüfi deyil. Sən demə, bir müddət əvvəl Gənclər və İdman Nazirliyi Muay-Tay kimi xırda idman klublarını Kinq-Boks Federasiyasına birləşdirmək, dolayısıyla onların xərcini də Adil Əliyevin çiyninə yükləmək istəyib. Musayev də bundan narazı qalıb və Adil Əliyevi ləkələmək fikrinə düşüb. Elə bu səbəbdən də Adil Əliyevi hədəf seçib onun barəsində ağlasığmaz ittihamlar səsləndirir. Halbuki Adil Əliyev olimpiada oyunlarından sayılmayan və nə ölkəmizə, nə də ona ad-san gətirməyən bu kimi federasiyaları maliyyələşdirilməsində ən az maraqlı tərəflərdən biri ola bilərdi. Ən əsası isə, Araz Musayevin bu zirvəyə yüksəlməsində Adil Əliyevin də xidmətləri az olmayıb. Bəzən ağır çəkisinə görə rəqibləri ilə rinqdə üz-üzə belə gəlməyən idmançı həm də vaxtilə Fövqəladə Hallar Nazirliyi kimi mühüm postda işlədiyindən onun asan uğurlarına göz yumulub və yarışlarda müəyyən yer tutmasına şərait yaradılıb. Bununla belə, onun Muay-Tay idman növü üzrə 9 dəfə dünya çempionu olması barədə deyilənlər də əfsanədən başqa bir şey deyil. Maraqlıdır ki, bu əfsanənin yaranmasında Adil Əliyevin də xidməti az olmayıb. Və indi bu xidmət böyük bir günah kabusuna çevrilib Adil Əliyevin arxasınca düşüb.

Araz Musayevin digər absurd iddiası özünü gözləyən təhlükə ilə bağlı dedikləridir. Prezidentə müraciətində “2-3 gündən sonra xəstəxanadan çıxıb təhlükə altında Azərbaycana qayıtmalıyam”, - deyən idmançı “amma qayıtmağının sual altında” olduğunu da vurğulayır. Səbəbini isə belə izah edir: “Qorxuram. Bilmirəm, mənə hansı reaksiya veriləcək? Qabağıma kimləri çıxaracaq? Mən həmişə evdən çıxanda arxama baxa-baxa gedirdim. Çünki mənə qarşı hücum olacağını gözləyirdim. Amma Adil Əliyev Azərbaycanda bunu mənə edə bilmədi. Çünki bizdə dövlət var. Qanunlarımız güclüdür. Ona görə də mənə qarşı təxribatı qardaş Türkiyədə törətdi”. 

Adama deyərlər ki, öz məmləkətin sənin üçün təhlükəsizlik adasıdırsa, onda niyə ora qayıtmaq istəmirsən? Bu qədər həngaməni niyə xarici ölkədə çıxarıb kiminsə barəsində əlində heç bir əsası olmayan iddialar irəli sürürsən? Niyə iddialarının “Azərbaycana başucalığı gətirmədiyini” bildiyin halda fakt kimi təqdim etdiyin qorxularını xarici bir ölkədə dost-düşmən arasında açıqlamaqdan çəkinmirsən? Axı sən eyni iddiaları Bakıya qayıtdıqdan sonra səsləndirə bilərdin. Belə çıxır ki, özün bilə-bilə Azərbaycan barəsində xoş olmayan təsəvvürlər yaradırsan.

 Üstəlik bunu edərkən, Araz Musayev Azərbaycan prezidentinin başqa hakimiyyət qollarının işinə müdaxilə edən qeyri-demokratik lider görüntüsünü yaratmaqdan da çəkinmir. Onun ölkə başçısına müracətlə səsləndirdiyi aşağıdakı fikirlər başqa cür düşünməyə əsas vermir: “Xahiş edirəm ki, göstəriş verəsiniz, hüquq mühafizə orqanları bu işi sürətləndirsinlər və Adil Əliyevi həbs etsinlər”. 

Adam deyəsən anlamır ki, özünün iddia etdiyi kimi, hadisə əgər Türkiyədə baş veribsə, İlham Əliyev o proseslərə istəsə belə qarışa bilməz. Çünki Türkiyə nə qədər öz müxalif qüvvələri tərəfindən tənqidə məruz qalsa da hakimiyyət bölgüsünün hökm sürdüyü məmləkətdir. Orada hüququn işinə nəinki başqa dövlətin rəhbərliyi, yeri gələndə heç Türkiyə prezidenti Rəcəb Tayib Ərdoğan da qarışa bilməz. Hüquq mühafizə orqanları imkanları çərçivəsində qanunsuzluqları araşdırıb lazımi ölçülər götürər və bu zaman isə heç kimin onun işinə müdaxiləsinə izn verməz. Əks halda, bu kimi müdaxilələr hüququn üstünlüyünə kölgə salar və məhkəmələr məhkəməlikdən çıxıb cəllad kötüyünə çevrilər. Nə yazıq ki, yeri gələndə İlham Əliyevə “hüquqi dövlət dərsi” verməyə çalışan Musayev hüququn bu fundamental tələblərini unudur, müxtəlit əsassız iddialar irəli sürərək şəxsən özü də ona müdaxilə etmək istəyir. Bununla da təkcə Azərbaycanın deyil, həm də Türkiyənin ədalətini şübhə altına alır.

Musayev məlum müraciətində iddia edir ki, guya Adil Əliyevin Bakıdan göndərdiyi “killer”lərin ikisi də Türk polisi tərəfindən göz altına alınıb. Bununla da özünün iddialarına haqq qazandırmaq istəyir. Söhbətləşdiyimiz idman camiəsi “killer” kimi təqdim olunan Azərbaycan Kinq-Boks Federasiyasının yetkililərinin həqiqətən də Türk polisi tərəfindən ifadə verməyə cəlb olunduqlarını təsdiqləyirlər. Amma onu da vurğulayırlar ki, həmin adamlar ciddi şübhələr əsasında deyil, sadəcə Araz Musayevin şikayəti əsasında istintaqa cəlb olunublar. Başqa sözlə, onların həbsdə saxlanılmasının müddətini istintaqın araşdırmaları və gəldiyi qənaətlər müəyyənləşdirəcək. Bu da zəruri tədbirdir və əgər Musayevin iddiaları təsdiqlənməsə onlar tezliklə sərbəst buraxılacaqlar. Ya da əks proses baş verəcək. Elədirsə, Musayev niyə tələsir? Niyə Türkiyə hüquq sisteminin normal qaydada işləməsi ilə qane olmur və ona Azərbaycan prezidenti səviyyəsində müdaxilə olunmasını arzulayır?

Müraciətində “Mən sakit, adi idmançıyam. Mənim heç kiminlə düşmənçiliyim, ədavətim yoxdur” deyən Musayev həm də əməlində hər hansı konkret cinayət faktı sübuta yetirilməyən Adil Əliyevin dərhal həbsini tələb edir. Bəs bu tələbin özü onun qərəzçiliyinə dəlalət etmirmi?

Musayevin absurd iddiaları barədə uzun-uzadı yazmaq fikrindən uzağam. Sadəcə onu vurğulamaq istəyirəm ki, mənim məqsədim kiminsə dəlilsiz-sübutsuz iddialarına hüquqi qiymət vermək deyil. Zatən görünən dağın bələdçiyə ehtiyacı yoxdur. Odur ki, məqsədim Adil Əliyev barəsində irəli sürülən bu absurd iddiaların əsl səbəbini aydınlaşdırmaqdır. 

Açığı, hakimiyyətin yürütdüyü müstəqil siyasət nəticəsində qonşularımızın, xüsusilə Rusiyanın ölkəmizdə xırda səs-küylü insidentlər törətməyə çalışdığı gün kimi aydındır. Bir müddət əvvəl hansısa rayonun bığ yeri yenicə ağarmış ağsaqqalı çıxıb 9 may “qələbə” bayramını rus imperializminin Georgi lenti kölgəsində qeyd edərək cəmiyyətimizdə süni ajiotaj yaratmağa çalışmadımı?

Özəlliklə də bu qarayaxmaların milli heysiyyatı ilə seçilən şəxslərə qarşı yönəldilməsi heç kimə sirr deyil. Adil Əliyevin də bu cür milli təfəkkürlü şəxslərdəndir və bu da səhv etmirəmsə heç kimdə şübhə doğurmur. Onun və qardaşı Məhərrəm Əliyevin Rusiyanın 5-ci kolonunun aparıcı nümayəndələri kimi ad çıxarmış Ramiz Mehdiyev komandası ilə nə qədər ciddi rəqabətdə olduğunu da bilməyən yoxdur. Mümkündür ki, son qarayaxmalar məhz eyni güc mərkəzinin - “5-ci kolon”un xüsusi tapşırığı ilə aparılır. Musayevin ittihamları arasında yer alan “Rusiyadan göndərilmiş 5 killer” iddiaları da bu mənada təsadüfə bənzəmir. 

O da sirr deyil ki, Ramiz Mehdiyevin komandası bir çox münahisəli əməliyyatları Türkiyədə həyata keçirir və iki dövlət arasındakı münasibətlərin korlanmasına çalışırdı. Yadınızdadırsa, vaxtilə “Gülərqeyt” hadisəsində cinayət şahidlərindən biri Türkiyəyə qaçmağa vadar edilmiş və orada qətlə yetirilmişdir. İndiki hadisədə də milli təəssübü ilə seçilən Adil Əliyev ətrafında yaradılmağa çalışılan mafioz imici ssenarisinin bütün iştirakçıları da Türkiyəyə toplanır və onlardan biri Moskvadan göndərilən saxta killer vasitəsilə “sui-qəsdə” uğrayır. Ssenarinin tamamlanmasından sonra saxta killerlər tutulur və sorğuya alınır. Sözsüz ki, sorğuda onların necə ifadə verməsi Adil Əliyev üzərində qurulan ssenarinin uğurlu alınıb-alınmamasını müəyyənləşdirəcək. Bu mənada Türkiyə və Azərbaycan hüquq mühafizə və təhlükəsizlik orqanları Adil Əliyev üzərində qurulan sui-qəsd ssenarisini diqqət mərkəzinə almalı, məkrli qüvvələrin bu məsələdə rolunu dərinliyinə araşdırmalı və sözügedən ssenaridə milli təhlükəsizliyimizin hədəf seçilib-seçilmədiyi ortaya çıxarmalıdır.

Heydər Oğuz