Xəbər lenti

 Qafar Qərib 1976-cı ildə Babək rayonunun Güznüt kəndində anadan olub.1993-cü ildə Babək rayon Çeşməbasar kənd orta məktəbini, 1999-cu ildə Naxçıvan Dövlət Universitetinin "Tarix-filalogiya" fakultəsini bitirib.

2000-ci ildə Prezident Təqaüdünə layiq görülüb.

Q.Qərib 1999-cu ildən Azərbaycan Yazıçılar Birliyinin üzvüdür.

Q.Qərib "Gözlərsən məni"(1998), "Gözümə döydüyüm şəkil"(2000), "İçimizdəki qəhrəman"(2002) və "Dünya üçbucaq imiş"(2004) şeir kitablarının müəllifidir

Qvqat.com Qafar Qəribin yeni şeirlərini oxucularına təqdim edir.

 

YAĞ, YAĞIŞIM

 «Yağ, yağışım, yağ, sel ol, yağ !

  Sırma-sırma, tel-tel ol, yağ!»

                       M.Müşfiq.

Yağ, yağışım !

Ümidimə, arzuma yox,

İçimdəki yanğıma yağ !

Söndür mənim atəşimi,

Heç səngimə, dayanma, yağ !

 

Yağ, yağışım !

Qəlbimizdən hisi, pası,

Yuyub apar Araza sən.

Bu dünyadan bu pisləri,

Oyub, apar Araza sən.

 

Yağ, yağışım !

Cəmiyyətə bəla olan

MİKROBLARI, VİRUSları

Dənizlərə yuyub töksün

Yağışının gur suları.

 

Yağ, yağışım !

Tankı, topu kir aparsın,

Çiçəklərə, güllərə yağ !

«Savaş!», «ölüm!», «zülm!» deyə

Od püskürən dillərə yağ !

 

Yağ, yağışım !

Anaların dağ çəkilmiş

Sinəsinə, qəlbinə yağ !

Hiddətindən çat-çat olmuş

Şəhidlərin qəbrinə yağ !

 

Yağ, yağışım !

Yağ, varlığın bəlli olsun,

Görsünlər ki, Sən də varsan.

Qəlbimdəki Qəm ağacın,

Öz suyunla yağ, suvar Sən.

 

 

 

MƏZARÜSTÜ

     ŞƏKİLLƏR

 

Əvvəllər ölənləri

 başdaşında şəkildən

Tanıyardı adamlar.

Öləndən sonra belə

Peşəsiylə, işiylə

Tanınardı adamlar:

Dülgər rəndəsiylə,

Dərzi qayçısıyla,

Şair qələmiylə,

Rəssam fırçasıyla

 tanınarmş həmişə.

 

Kefli İsgəndəri

 bir boş şüşədən,

Hacı Qaranı

 bir dolu küpədən

Tanıyarmış adamlar.

 

Şəkilsiz məzarları

Heç kimsə xatırlamaz,

 ziyarətsiz qalarmış.

Əməli olmayanlar

Olümündən sonra da

 çox hörmətsiz olarmış.

 

Günlərin bir xoş günü

 ölsəm, işlər dəyişər.

Görən əməllərimçün

Bu şəkillər içindən

 qismətimə nə düşər?!

Mən ölsəm, başdaşımda

 çəkməyin qələm şəkli.

Bu ömrü başdan-başa

 dərd-qəmlə oynamışam –

Çəksəniz də çəkərsiz

 QƏM şəkli, ƏLƏM şəkli…

O qəm ki, sözə gəlmədi.

Cilid-cilid kitabımda

 mən onu yaza bilmədim,

 varlığın yoza bilmədim…

Əzdi məni, yüz yol əzdi,

 mən onu əzə bilmədim.

 

Ölsəm, məzarım üstə

 bu DƏRDİ çəkin, bala !

Ən yaxşı rəssamları

 yığın məzarım üstə –

 zəhmətim çəkin, bala !

 

Kim çəksə, bu şəkili,

 bilin kişidi, mərddi.

Kömək üçün deyim ki,

Dərd özü qara olur –

Qaranın özü dərddi…

                                  

 

               TƏLƏSMƏ, ADAM, TƏLƏSMƏ!

 

                      Bu yol hara gedir belə?!

                      Ayaq tutan gedir elə...

                      Son mənzili bilə-bilə,

                      Tələsmə, adam, tələsmə!

 

                      Bu dünyanın özü hədər,

                      Mini gələr, mini gedər.

                      Bu karvana hamı yetər,

                      Tələsmə, adam, tələsmə!

 

                      Əcəl adlı ata çatsan,

                      Bil, əbədi yatacaqsan.

                      Qorxma, vallah çatacaqsan,

                      Tələsmə, adam, tələsmə!

 

                      Səhər bilmə xoruz banın,

                      Öz iyi var sübhün, danın.

                      Qədrini bil hər bir anın,

                      Tələsmə, adam, tələsmə!

 

                      Bir dünyanın işinə bax;

                      Kimisi ac, kimisi tox.

                      Axirətdə yerimiz yox,

                      Tələsmə, adam, tələsmə!

 

                      Ocağında odunu çat,

                      Kədərinə gəl sevinc qat!

                      Sən Əcəlin başını qat,

                      Tələsmə, adam, tələsmə!

 

                      Hər istəyə yetmək olmaz,

                      İstəyincə getmək olmaz,

                      Bu zamandı, ötmək olmaz,

                      Tələsmə, adam, tələsmə!

 

                      Bu dünyanın yönü bəlli,

                      Hər insanın donu bəlli.

                      Ömrümüzün sonu bəlli,

                      Tələsmə, adam, tələsmə!

 

 

 

                       BİR YER BİLİRƏM...       

         

                      Bir yer bilirəm...

                      Orda ancaq iki rəng var--

                               ağ və qara.

                      Başqa bir rəng görəmməzsən

                               baxsan ora.

 

                      Bir yer bilirəm...

                      Gözəl yerdir. Oranın öz

                               qanunu var, qaydası var.

                      Nə zamansa bir yetimə

                               salam verib, qəlb almağın

                               həmin yerdə faydası var.

                      Orda hakim – Allah özü,

                      “Vəkil” işin tapşırıbdı

                               mələklərə...

                      Qayda bu ki, gərək Allah

                      Hər əməli--xeyir-şəri

                               ələkləyə...

 

                      Bir yer bilirəm...

                      O yer--haqqın, ədalətin

                               olduğu, yer...

                      İnanın ki, haqqın atı

                               ancaq orda çapa bilər.

                      İnsan oğlu ədaləti

                               ancaq orda tapa bilər.

 

                      Kimsə kimdən artıq deyil,

                               bərabərdi orda hamı...

                      Bir ölçüdə bütün evlər,

                               nə saray var,

                               nə də sadə “kasıb damı”...

 

                      Bir yer bilirəm...

                      Orda hamı bir geyinir--

                               doğulanda və öləndə

                               geydiyini...

                      Əyriliyə ehtiyac yox,

                      Görənməzsən bir kimsənin

                               orda haram yediyini...

                      Nə geyim dərdi var,

                               nə də yemək...

                      Gözəl yerdir ora demək.

 

                      O gözəl yer – Axirətdi,

                               nişan verdim yeri də mən...

                      Fikirləşin, gedən varsa,

                               gəlsin gedək,

                                         biri də mən...




Ana səhifəyə qayıt        Baxış: 2 115          Tarix: 29-04-2017, 10:07      

Xəbəri paylaş


Paylaş:   

Prizma