Xəbər lenti

 

"Müasir ticarət mərkəzləri geniş xidmət sahələrini əhatə edir və burada geyim, bəzək məmulatları, məişət əşyalarının alış-verişi ilə yanaşı, həm də uşaq əyləncə mərkəzləri, kino zalları, avtomaşınların parkingi, yeməkxana, gözəllik salonları və s. fəaliyyət göstərir. Odur ki, ticarət mərkəzləri təkcə gənclərin və yaşlıların deyil, həm də uşaqların üz tutduğu, insanların daha sıx toplaşdıqları iri obyektlərdir və bu obyektlərdə yanğın təhlükəsizliyinin təmin olunması çox vacibdir”.
Ovqat.com xəbər verir ki, bunu APA-ya açıqlamasında Fövqəladə Hallar Nazirliyinin (FHN) Dövlət Yanğın Nəzarəti Xidmətinin şöbə rəisi, daxili xidmət polkovniki Elnur Babayev bildirib.
O qeyd edib ki, son illər dünyanın bir çox ölkələrinin – Rusiyanın, Birləşmiş Ərəb Əmirliklərinin, İtaliyanın, Almaniyanın, İspaniyanın və s. yanğın statistikasında ticarət mərkəzlərində yanğınların baş verməsi faktlarına tez-tez rast gəlinir: "Həmin ölkələrdə, eləcə də ötən il respublikamızda "Diqlas”, "Binə”, "Sədərək”, "Eurohome” kimi ticarət mərkəzlərində baş vermiş yanğınlar göstərir ki, ticarət mərkəzlərində yanğın təhlükəsizliyi məsələsinin ciddiliyi aktual problemlərdəndir. Belə ki, adıçəkilən ticarət mərkəzlərində yanğınların təhlili bir daha göstərdi ki, bu obyektlərdə quraşdırılmış yanğına qarşı avtomatika qurğuları tələb olunan bütün sahələri əhatə etmir, mövcud qurğulara vaxtaşırı olaraq, xüsusi razılığı (lisenziyası) olan müəssisələr tərəfindən lazımi xidmət göstərilmir, ilkin yanğınsöndürmə avadanlıqları, həmçinin yanğına qarşı su təchizatı sistemləri bir çox hallarda nasaz vəziyyətdə saxlanılır, işçilərdən ibarət könüllü yanğınsöndürmə dəstələri fəaliyyət göstərmir, kiçik sahibkarlar müəssisənin məsul şəxsləri tərəfindən yanğına qarşı təlimatlandırılmır, təxliyə yollarına satış malları yığılaraq ara məsafələrinə riayət olunmur. Bütün sadalananlarla yanaşı daşınmaz əmlakın icbari sığortalanması tədbirinə də laqeyd münasibət göstərilir”.
Dövlət Yanğın Nəzarəti Xidmətinin həmçinin obyektlərdə maye qaz balonlarından qaydalara zidd şəkildə istifadə olunmasının qarşısını almaq üçün də tədbirlər həyata keçirdiyini qeyd edən E.Babayev buna misal olaraq, 8 yanvar 2020-ci il tarixində paytaxtın Səbail rayonu, Rəsul Rza küçəsində yerləşən restoranların birində propan qaz balonundan istifadə olunması ilə bağlı FHN-in Dövlət Yanğın Nəzarəti Xidmətinə daxil olmuş məlumat əsasında Xidmətin əməkdaşları tərəfindən yerində araşdırma aparıldığını bildirib: "Araşdırma zamanı məlum oldu ki, obyekt dördmərtəbəli yaşayış binasının 1-ci mərtəbəsində yerləşir və restoran kimi fəaliyyət göstərir. Obyektdə binanın arxa fasadına bitişik hissədə - yaşayış binasının həyətində yerləşən dəmir qutunun içərisində quraşdırılmış iki ədəd propan qaz balonundan istifadə edilir ki, bu da təhlükəsizlik qaydalarına ziddir. Belə ki, YTQ № 01-2001 Azərbaycan Respublikasında yanğın təhlükəsizliyi Qaydalarının 3.9 bəndinin tələbinə əsasən ictimai və mülki binaların ərazilərindəki açıq meydança və həyətlərdə sıxılmış və mayeləşdirilmiş qazla dolu olan balonların saxlanılmasına icazə verilmir. Qeyd olunanları nəzərə alaraq, FHN əməkdaşları tərəfindən aşkar olunmuş propan qaz balonunun təhlükə mənbəyi olması barədə obyektin icarədarına ətraflı izahat verilib, akt tərtib olunaraq propan qaz balonunun quraşdırıldığı yaşayış binasının ərazisindən çıxarılması və icarədar tərəfindən gələcəkdə bu halın bir daha təkrarlanmaması barədə öhdəlik götürməsi təmin olunub.
Dövlət Yanğın Nəzarəti Xidməti tərəfindən bu sahədə işlər aparılır və gələcəkdə ticarət və əyləncə mərkəzlərində yanğınların baş verməməsi üçün ciddi tədbirlər həyata keçirilir. FHN-nin Dövlət Yanğın Nəzarəti Xidməti yanğın təhlükəsizliyi norma və qaydalarına riayət edilməsinin vacibliyini bir daha vətəndaşların diqqətinə çatdırır, gündəlik həyatımızda aşkar edilmiş hər bir qayda pozuntusu barədə 112 qaynar xəttinə müraciət etməyi, hər bir qüsuru ictimai qınaq obyekti və hədəfinə çevirməyi tövsiyə edir”.



Ana səhifəyə qayıt        Baxış: 413          Tarix: 8-01-2020, 22:52      

Xəbəri paylaş


Paylaş:   

Prizma