Bu gün Bakı Ağır Cinayətlər Məhkəməsində qətl törətməkdə təqsirləndirilən Rasim Çərtikovun cinayət işi üzrə məhkəmə iclası davam etdirilib. Strateq.az-ın “Report”a istinadən verdiyi  xəbərə görə, hakim Mayıl Bayramovun sədrliyi ilə keçirilən prosesdə dövlət ittihamçısı ittiham aktını elan edib.

Elan olunmuş ittiham üzrə R.Çərtikov özünü qismən təqsirli bildiyini deyib. O deyib ki, 33 illik həyat yoldaşını qısqanclıq zəminində öldürüb: “Arvadım Arifə öz istəyi ilə dayəlik işinə başladı. İki ay özüm onu işə aparırdım. Razı deyildim onun çalışmağına. Sonra Arifə gecə növbəsində çalışmaq istədi. Aramızda mübahisə düşdü, küsüb atası evinə getdi. Onun iş yerinə də getdim ki, Arifənin işinə xitam verilsin. Yaxın adamla qaynanamgilə gedib onu evə gətirdim. Arifə razılaşdı ki, ancaq gündüz növbəsində işləyəcək. Əvvəl bu qayda ilə çalışdı, sonra fikrini dəyişdi. Arifə işlə bağlı Türkiyəyə getdi, bunu da məndən gizlətdilər. İçimdə şübhələr oyanırdı. Evi satıb Rusiyaya getmək barədə ona dedim. Ancaq yuxarı mərtəbəni satmağa razılaşdı. Evi satandan sonra gecə onu işdən götürdüm, lakin Rusiyaya getmək istəmədiyini bildirdi”.

Təqsirləndirilən şəxs deyib ki, onu öldürmək niyyəti olmayıb: “Mənə “səndən bir kişi kimi həzz almıram” deyib “öldürsən də, işdən çıxıb Rusiyaya getməyəcəm” söylədi. Mən də onu öldürdüm“.

Qeyd edək ki, hadisə bu il Binəqədi rayonunda baş verib. R.Çərtikov həyat yoldaşı Arifə Çərtikovanı qətlə yetirib. O, hadisəni qısqanclıq zəminində törətdiyini bildirib.