Türkiyədə yanan meşələr söndürüldükcə yeni yanğın ocaqları meydana gəlir.
 
Ovqat.com-un məlumatına görə, ölkənin Kənd Təsərrüfatı və Meşə naziri Bəkir Pakdəmirin son açıqlamaları da bunu göstərir.
 
Nazirin bildirdiyinə görə, indiyədək 107 yanğın hadisəsi baş verib, onun 98%-i nəzarət altına alınıb. 9 yanğın ocağında söndürmə çalışmaları hələ də davam edir.
 
Dünən axşam Türkiyə Prezidenti Rəcəb Tayib Ərdoğan yanğınların terror aktından qaynaqlanması ehtimalını gücləndirən açıqlama verib. Türkiyə liderinin iddiasına görə, yanğınların terror hadisəsi olması barədə bəzi əlamətlər ortaya çıxıb və bu ekoloji savaşın arxasında dayananlar kimliklərindən asılı olmayaraq, öz adekvat cavablarını alacaqlar. “Orman yangınlarında terör şüphesi tespit edersek ki şimdiden bazı emarelere ulaşıldı, sonu nereye giderse gitsin takip edecek, gereğini yapacağız”, -deyən  Ərdoğanın sözlərindən belə anlaşılır ki, Ankara yanğın təxribatlarında təkcə hansısa terror təşkilatından deyil, həm də düşmən dövlətlərdən şübhələnir.