Sakaaşvilini həbsxanada döyüblər.
 
Ovqat.com xəbər verir ki, Gürcüstanın eks-prezidenti vəkili vasitəsilə ictimailəşdirdiyi məktubda bu iddianı irəli sürüb.
 
“Həbsxana xəstəxanasının əməkdaşları məni maşından çıxarmağa çalışdılar. Mən imtina edəndən sonra cinayətkarların qışqırtıları və söyüşləri fonunda məni zorla itələdilər, sürüyərək boynuma bir neçə zərbə vurdular. Məni saçımdan dartdılar və təbii ki, o zaman mən onlara müqavimət göstərdim”, - Saakaşvili məktubunda bildirib.
 
Vəkilin sözlərinə görə, Gürcüstanın keçmiş rəhbəri aclıq aksiyasını davam etdirir, müalicədən və dərmandan imtina edir.
 
Qeyd edək ki, bir müddət əvvəl Gürcüstanın Ədliyyə Nazirliyi Saakaşvilinin tibbi avadanlıqları zədələdiyini və klinikanın əməkdaşlarını təhqir etdiyini bildirmişdi. Bu iddialara aydınlıq gətirən sabiq prezident isə vurğulayıb ki, ona hansısa iynə vuracaqlarını gördüyü üçün belə edib. 
 
Hadisə ilə bağlı istintaq araşdırmaları başlanılıb.