"İlin əvvəlindən Rusiya Federasiyasının ərazisində 4 minə yaxın meşə yanğını baş verib".
 
Ovqat.com xəbər verir ki, bunu Rusiya prezidenti Vladimir Putinlə görüşdə ölkənin Fövqəladə Hallar Nazirliyinin rəhbəri vəzifəsini icra edən Aleksandr Çupriyayan bildirib.
 
Onun sözlərinə görə, ilin əvvəlindən indyədək Rusiyada ümumilikdə 138 mindən çox təbii və texnogen yanğın qeydə alınıb. İlk təbii yanğınlar yanvar ayında baş verib, apreldə isə “yanğın mövsümü tam gücü ilə fəaliyyətə başlayıb”: “Son məlumatlara görə, ölkədə ümumi sahəsi 12 min hektardan çox olan 101 meşədə yanğınlar tüğyan edir. Bunlardan 39-u 7000 hektar sahədə lokallaşdırılıb”.
 
Çupriyan qeyd edib ki, hazırda Rusiyada yaşayış məntəqələri yaxınlığında 35-dən çox meşə yanğını aktivdir: "Yaşayış məntəqələrindən beş kilometrlik zonada 1700 hektar sahədə 35 meşə yanğını var ki, onlardan 16-sı lokal xarakter daşıyır". 
 
Bildirildiyinə görə, meşə yanğınları Rusiyanın əksər vilayətlərini - 85 regiondan 77-ni əhatə edib. 49 regionda xüsusi yanğın rejimi, iki regionda isə meşələrdə fövqəladə rejim tətbiq edilib.
 
Fövqəladə Hallar Nazirliyinin rəis əvəzi yanğınların yaşayış məntəqələri və təsərrüfat obyektləri üçün təhlükə yaratmadığını, təhlükələrin aradan qaldırıldığını bildirib: "Hesab edirəm ki, [yanğınlara] operativ reaksiya verilməsi ilə bağlı prioritet vəzifələr öz həllini tapıb. İnsanların həyatı və sağlamlığı (o cümlədən yaşayış məntəqələri və təsərrüfat obyektləri) üçün təhlükə aradan qaldırılıb". 
 
Çupriyayan vurğulayıb ki, hazırda Rusiya Federasiyasında yanğınlarla bağlı vəziyyət Rusiya Fövqəladə Hallar Nazirliyinin nəzarətindədir. "Yaşayış məntəqələri və təsərrüfat obyektləri üçün heç bir təhlükə yoxdur", - o əlavə edib.