Azərbaycanın ərazi bütövlüyü həm də anklavlar deməkdir: iki belə anklav bizim iki beynəlxalq magistral yolumuzun üzərində yerləşir.

Musavat.com xəbər verir ki, bu fikir erməni iranşünas Arut Arakelyan tərəfindən yerli mətbuata müsahibəsində səslənib.

“Ermənistanın müstəqilliyinin ilk günlərində Kərki ələ keçirildi. Bunun sayəsində bizim Sünik və Qarabağa yolumuz açıldı. Həmin yolla hərbi texnikaların daşınması həyata keçirilib. Bir anlıq təsəvvür etsək ki, Kərki artıq Azərbaycan magistralıdır, o zaman İranın Avropaya yük daşımağa ümid etdiyi marşrutu olmayacaq. İran indi 250 milyard dollarlıq ticarət həcmindən danışır. Bu, orta hesabla bir milyon konteynerdir. Tatev yolu ilə bu hara getməlidir? Mən bunu “media orqazmı” adlandırdım, çünki insanlara baş verənlərə baxmağı tövsiyə edirlər, amma onların gözləri altında başqa bir şey baş verir”, - deyə Arakelyan bildirib.

Erməni ekspertin sözlərinə görə, İran anklavların Azərbaycana verilməsində böyük problem görür:

“Bir neçə ay əvvəl Azərbaycanda fəaliyyət göstərən iranlı qrup bir bəyanat verdi. Mən hələ o zaman yazdım ki, bu, Ermənistana xəbərdarlıqdır. İranlıların fikrincə, hüquqi qərarlar olsa belə, ərazilərinizin bəzi hissələrini Azərbaycana verməməlisiniz”.

Arakelyan Türkiyə Prezidenti Rəcəb Tayyib Ərdoğanın İranın Zəngəzur dəhlizinə maneə olması ilə bağlı bəyanatına da toxunub. Onun bildirdiyinə görə, əslində, Ermənistanın bu gün də həmin dəhzlizə “yox” deməyə resursları yoxdur.