“Ermənistan Respublikası sülh gündəliyinə sadiqdir və bütün danışıqlar zamanı bütün məsələlərə konstruktiv yanaşır. Sülh müqaviləsinin bağlanması ətrafında aparılan bütün danışıqlar zamanı biz artıq bir sıra razılaşmalar əldə etmişik. Ancaq təəssüf ki, tərəflərin baxışlarının hələ də bir-birindən uzaq olduğu iki əsas məsələ var”.

Ovqat.com-un məlumatına görə, Ermənistan Xarici İşlər naziri Ararat Mirzoyan Ermənistanın İctimai Televiziyasına açıqlamasında belə deyib.

Onun sözlərinə görə, fikir ayrılıqlarından biri ərazi bütövlüyünün qarşılıqlı tanınması və növbəti demarkasiya prosesinə, digəri isə infrastrukturların blokdan çıxarılmasına aiddir: “Biz bu iki məsələni Alma-Ata Bəyannaməsi ilə əlaqələndirmək istəsək, Azərbaycanın istəksizliyini görürük”.

Ermənistanın xarici işlər naziri bəyan edib ki, həqiqətən də Cənubi Qafqaz regionunda uzunmüddətli sülhün bağlanması üçün tarixi fürsət yaranıb. O, ümid edir ki, tərəflər yaxın gələcəkdə bu məsələlərdə də ümumi fikrə gələ biləcəklər. “Son vaxtlar Ermənistan və Azərbaycan komissiyaları arasında bir sıra işgüzar görüşlər keçirilib və hazırda müzakirə masasında bir sıra variantlar var. Ola bilsin ki, yaxın gələcəkdə bu məsələlərdə də irəliləyiş əldə etmək mümkün olsun”, - Mirzoyan qeyd edib.

Ermənistan-Azərbaycan sərhədinin delimitasiyası və demarkasiyası proseslərindən danışan Mirzoyan bildirib ki, bu proseslər ümumilikdə ayrı-ayrılıqdadır, lakin onlara münasibətlərin ümumi tənzimlənməsi kontekstində baxmaq lazımdır.

Bundan əvvəl Ermənistanın baş naziri Nikol Paşinyan Azərbaycanla sülh müqaviləsinin üç əsas prinsipinin razılaşdırıldığını bildirib. Onların sözlərinə görə, Ermənistan və Azərbaycan müvafiq olaraq 29,8 və 86,6 min kvadratkilometrdə bir-birinin ərazi bütövlüyünü tanıyır. Delimitasiya prosesi Alma-Ata Bəyannaməsi əsasında həyata keçirilir. Bütün regional kommunikasiyaların blokdan çıxarılması da masadadır.