Rusiyalı biznesmen Roman Abramoviç müxalifət lideri Mixail Xodorkovski ilə dueldə Vladimir Putinin postunu tuta bilər.

Axar.az xəbər verir ki, bunu siyasi strateq, politoloq Mixail Şeytelman deyib.

Politoloq Abramoviçin "Vaqner"in üsyanı zamanı özünü dövlət adamı kimi göstərdiyini, Moskvadan qaçmaq əvəzinə, illər sonra paytaxta üz tutduğunu vurğulayıb.

Onun sözlərinə görə, "Vaqner"in yaradıcısının üsyanından sonra rusiyalı milyarder Moskvada tez-tez görünməyə başlayıb.

Şeytelman Abramoviçin Türkiyə Prezidenti Rəcəb Tayyib Ərdoğanın məxfi agenti olduğunu istisna etməyib:

"Ərdoğanın casusu kimdir? Abramoviç deyilmi? Yaxşı, şəxsən mənim üçün. İndi Abramoviç real gücdür? Mən belə düşünürəm".

Siyasi strateq qeyd edib ki, Rusiyaya üç komponenti özündə birləşdirən lider lazımdır - siyasi tələblər, hansısa ciddi hərbi birləşmənin dəstəyi, həmçinin milyarder:

"Abramoviçdə bunlardan ikisi var və Rusiya ordusundakı problemləri nəzərə alsaq, hərbi dəstək tapmaq o qədər də çətin deyil".